ئه‌نجامێن پشكنینا DNA وه‌كهه‌ڤی یێن دایكا وی ده‌ركه‌تن

پشتی ل مه‌ها بۆری ده‌نگ و باسێن لێكگوهارتنا زارۆیه‌كێ‌ كور ب ئێكا كچ هاتینه‌ به‌لاڤكرن، دایبابێن زارۆی كێشه‌ گه‌هانده‌ دادگه‌هێ‌ و بڕیار هاته‌ دان پشكنینا DNA ل هه‌ولێرێ‌ بهێته‌ كرن بۆ پشت راستبوون ژ ئه‌نجامان و دوهی ئه‌نجام هاتنه‌ راگه‌هاندن كو وه‌كهه‌ڤی یێن دایكێ‌ بوون.
د.چنار مسته‌فا ئامێدی، رێڤه‌به‌را نه‌خۆشخانا ژنان و زارۆبوونێ‌ دیاركر كوپشتی زه‌لامێ‌ وێ‌ ژنێ‌ سكالایه‌ك تومار كری، ل دووڤ داخوازیا دادوه‌ری بڕیار هاته‌ دان پشكنینا DNA بۆ زارۆی و دایكا وی بهێته‌ كرن و گۆت: مه‌ زارۆ و دایبابێن وی هنارتنه‌ تاقیگه‌ها فارمال ل هه‌ولێرێ‌ و پشتی پشكنین بو هاتیه‌ دروستكرن بوماوێ‌ 15 روژا ئه‌نجام ده‌ركه‌فتن و دیاربوو ئه‌و زارۆ یێ‌ وێ‌ دایكێ‌ یه‌.
رێڤه‌به‌را نه‌خۆشخانا ژنان و زارۆبوونێ‌ دیاركر كو وان ئاریشه‌ ل گه‌ل هه‌ڤالبه‌ندا نه‌خۆشێ‌ هه‌یه‌ و گۆت: چونكو گۆتبوو دێ‌ ده‌ستێ‌ خوه‌ ل قورئانێ‌ ده‌م كو زارۆ كوره‌ و دیاربوو كو یا شاشه‌، له‌ورا ئه‌م وه‌كو رێڤه‌به‌ریا نه‌خۆشخانێ‌ دێ‌ سكالایه‌كێ‌ ل سه‌ر توماركه‌ین.
د.چنار ئه‌وژی دیاركر كو شاشی ل ده‌ڤ په‌رستارێن نه‌خۆشخانێ‌ په‌یداببوو و دكیومێنتكرنا وان ل سه‌ر ته‌به‌لا نه‌خۆشی و توماركرن ژی یا شاش بوویه‌ و پتر پالپشتی ل سه‌ر گۆتنا هه‌ڤالبه‌ندا نه‌خوشی كربوو كو ئه‌ڤه‌ تشته‌كێ‌ نه‌دروسته‌ و ژلایێ‌ كارگێری ڤه‌ مه‌ لیژنه‌یه‌ك پێكئینایه‌ و ئه‌و په‌رستار دێ‌ هێنه‌ سزا دان و گۆتژی: پشتی په‌یدابوونا ڤێ‌ بۆیه‌رێ‌ مه‌ هنده‌ك پێرابوونێن دیتر ل نه‌خۆشخانێ‌ وه‌رگرتینه‌ و دێ‌ ژمارا كامیرا ل نه‌خۆشخانێ‌ زێده‌كه‌ین و دیسا مه‌ هنده‌ك پازنێن دو ره‌نگی په‌یداكرینه‌ كو دێ‌ كه‌ینه‌ ده‌ستێ‌ زارۆی و دایكا وی و ب تنێ‌ دێ‌ په‌رستاره‌ك سه‌رپه‌رشتیێ‌ لێ‌ كه‌ت هه‌تا زارۆ دهێته‌ ل سه‌ر دونیایێ‌ داكو شاشی په‌یدانه‌بن