هه‌ر 10 بتلێن خوینێ خاله‌كێ بۆ وه‌رگرتنا پارچێن عه‌ردی زێده‌دكه‌ن
هاتیه بلاڤکرن روژا ئێک شه‌مبێ, 16 خزیران 2013 - 10:58am
ب هه‌لكه‌فتا رۆژا جیهانی یا خوین به‌خشان، ب چاڤدێریا ته‌مه‌ر ره‌مه‌زان پارێزگه‌رێ دهۆكێ، دوهی 15/6/2013 كۆمه‌لا خوین به‌خشێن كوردستانێ لقی دهۆك ب هه‌ڤكاریا رێڤه‌به‌ریا گشتی یا ساخله‌میا پارێزگه‌ها دهۆكێ د ئاهه‌نگه‌كێ دا 100 خوین به‌خش خه‌لاتكرن.
حه‌مزه ره‌زیكی، سه‌رۆكێ كۆمه‌لا خوین به‌خشێن كوردستانێ دیاركر كو ژمارا خوین به‌خشێن دهۆكێ گه‌هشتیه 2862 كه‌سان و گۆت: د پێنج هه‌یڤێن بۆری دا ئه‌م شیاینه یازده هه‌وێن خوین به‌خشینێ ئه‌نجام بده‌ین و 662 بتلێن خوینێ بۆ نه‌خۆشێن دابین بكه‌ین.
سه‌رۆكێ لقی دهۆك دیاركر ژی كو بڕیاره‌ك ده‌رچوویه هه‌ر كه‌سێ 10 بتلێن خوینێ ب به‌خشیت دێ خاله‌ك بۆ وه‌رگرتتنا پارچێن عه‌ردی زێده‌بیت و گۆت: ئه‌ڤ بڕیاره ب تنێ بۆ خوین به‌خشێن پارێزگه‌ها دهۆكێ یه.
دیاركر ژی كو ب هه‌لكه‌فتا رۆژا جیهانی یا خوین به‌خشان ئه‌و شیان ب پشته‌ڤانیا پارێزگه‌ها دهۆكێ 100 خوین به‌خشان خه‌لات بكه‌ن و دیاریێن رێزگرتنێ پێشكێشی 18 كه‌سایه‌تی و لایه‌نان بكه‌ن.
د.نزار عسمه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو هه‌موو هه‌ولێن ئه‌وون خوینه‌كا پاقژ و ساخله‌م بو نه‌خۆشان ل ده‌زگه‌هێن ساخله‌میێ بهێته دابینكرن و گۆت: بو هندێ كو چ ئاریشه د خوینێ دا په‌یدانه‌بن، ئه‌و هه‌موو پشكنینان بۆ خوینێ دكه‌ن به‌ری بده‌نه كه‌سێن پێدڤی.
هه‌روه‌سا دیاركر كو د به‌رنامێ واندایه به‌نكه‌كا خوینێ یا هه‌ڤچه‌رخ و ل دووڤ ستاداردێن جیهانی ل پارێزگه‌ها دهۆكێ بهێته ئاڤاكرن.
.jpg)
ئه‌ڤ مالپه‌ره فرێکه
