هه‌ول دهێنه دان نه‌خۆش ل وه‌لاتێ لبنانێ بهێنه چاره‌كرن
هاتیه بلاڤکرن روژا دوو شه‌مبێ, 8 تیرمه‌هـ 2013 - 9:44am
بۆ دیتنا ره‌وشا خزمه‌تێن ساخله‌میێ ل زانكۆ و نه‌خۆشخانا ئه‌مریكی ل وه‌لاتێ لبنانێ و بۆ مه‌ره‌ما ئیمزاكرنا پرۆتوكوله‌كێ بۆ چاره‌كرنا نه‌خۆشێن هه‌رێمێ ل وێرێ و مفا وه‌رگرتن ژ شیانێن وان دبیاڤێ پێگه‌هاندنێ دا، شانده‌كێ هه‌رێمێ سه‌ره‌دانا لبنانێ كر.
د. نزار عسمه‌ت، رێڤه‌به‌رێ گشتیێ ساخله‌میا پارێزگه‌ها دهوكێ دیاركر كو شانده‌كێ هه‌رێما كوردستانێ پێكهات بوو ژ راوێژكارا سه‌رۆكێ حكوومه‌تێ وچه‌ندین رێڤه‌به‌رێن گشتی یێن وه‌زاره‌تا ساخله‌میێ سه‌ره‌دانا زانكۆیا ئه‌مریكی و نه‌خوشخانا ئه‌مریكی ل به‌یروتێ كرن، وگۆت: نێزیك چاڤپێكه‌فتن دگه‌ل راگرێ زانكۆیا ئه‌مریكی و سه‌رۆك پشكان و رێڤه‌به‌رێ نه‌خوشخانێ هاته‌كرن، ژ پێخه‌مه‌ت زانینا وان بیاڤێن چاره‌سه‌ریا نه‌خوشان دهێته‌كرن و هه‌روه‌سا چه‌وانیا مفا ژێ وه‌رگرتن ژبۆ چاره‌سه‌ركرنا نه‌خوشان ئه‌وێن كو ل كوردستانێ چاره‌سه‌ری بو نه‌هێته‌كرن.
د.نزار عصمه‌ت دیاركر ژی كو د وارێ پێگه‌هاندنا كارمه‌ندان چ وه‌ك په‌رستار یان نوشدار و ئینانا پسپوران ژی وان كۆمبوون ئه‌نجام دان و گۆت: دان وستاندن ل سه‌ر ڤان هه‌موو بابه‌تان دگه‌ل وان هاته‌كرن و ل نێزیك دێ به‌رده‌وامیا ڤان دان وستاندنا هێته‌كرن، ژ پێخه‌مه‌ت گه‌هاندنا رێككه‌فتنه‌كێ، هه‌كه هات و ئه‌ڤ رێككه‌فتنه هاته ئیمزاكرن ژلایێ حكوومه‌تا هه‌رێما كوردستانێ و دگه‌ل زانكۆیا ئه‌مریكی، دێ بیته ده‌رگه‌هه‌كێ باش بۆ پێشكه‌فتنا ساخله‌میێ.
ئه‌ڤ مالپه‌ره فرێکه
