پروگرامهكێ نوو یێ ساخلهمیێ بۆ قوتابێن باخچهی تا زانكویێ دێ هێته دانان
بڕیاره ههر ژ ئهڤرۆ دهست ب پرۆگرامهكێ نوو دوارێ ساخلهمیا قوتابیان دا بهێته كرن و ههموو قوتابیێن باخچهی تا زانكۆیێ ب خوهڤهبگریت، رێڤهبهرێ بنگههێ زانین یێ ساخلهمیا قوتابخانان ل گهل وێ چهندێ یه كو دانانا وی پرۆگرامی دێ ههموو پێزانین ل سهر ژیانا قوتابی ژلایێ ساخلهمیێ ڤه هێنه كۆمكرن و بڕیار ئهوه رۆژانه ههر بنگهههك 50 قوتابیان برێڤهببهرت.
د.نورهدین عهبدوللا حهمدی، رێڤهبهرێ سهنتهرێ زانین یێ ساخلهمیا قوتابخانا دیاركر كو فۆرمهكێ نوو یێ ساخلهمیێ ژلایێ وهزارهتا ساخلهمیا بهغدا و ههرێمێ یێ هاتیه دهستنیشانكرن و بڕیاره ل حهفتیا بهێت دهست پێ بكهن و گۆت:
ئهڤه فۆرمه ژ قۆناغا باخچهی و سهرهتای و بنهرهتی و ئامادهی و كولیژێ دێ ب خوهڤه دگریت.
دیاركر ژی بۆ ئهنجامدانا پشكنینان جوداهی دناڤبهرا قوتابیان دا ههیه و گۆت: ئهم گهلهك گرنگیێ ب قۆناغا باخچهی و بنهرهتی و حهفتێ د دهین، چونكو ئهڤه قوناغێن سهرهكی یێن گوهۆرینێ نه دژیانێ دا و پێشكنینا وان ب شێوازهكێ گشتی دهێته كرن و ههكه نهخۆشی ههبن یان ههستیاری دهربارهی هندهك نهخۆشیان ههبن دێ هێنه دهستنیشانكرن و پاشان تشتێن تایبهت دهێنهكرن وهكی پشكنینا چاڤێن وان كا چاڤ وێری یان كورهبوونا رهنگان ههیه یان نه، ههروهسا پشكنینا گوهی بۆ دهێته كرن، ئهوژی ئهم دێ دگهل ئاخڤین ههكه مه گۆمان ههبوو ئاریشه یا ههی د گوهلێبوونێدا ئهم دێ پشكنینهكا دی بۆ كهین، ههروهسا كێش و درێژیا وان دهێته كێشان و پیڤهرێ كێشا لهشی كو ئهم دبێژینێ(مربع كتلت الجسم) ههروهسا ئهم دهر دئێخین كا ئهڤه قهلهوه زهعیفه یان كورتهبالایه یان سروشتی یه، دیسا دیتنا كێم ئهندامان ژی دێ نڤێسین ل گهل بارێ ڤاكسیندانێ و ڤاكسینهكا نوو بۆ دهێته دانان، ئهڤه ههموو پشكنینهكا دهستپێكیه بهلێ گهلهكا گرنگه .
دهربارهی قوتابیێن ئامادهی و كولیژێ ژی دیاركر كو ئهڤ پشكنینه ب تێروتهسهلی بۆ ناهێنهكرن، پتر دوپاتی ل سهر چاڤ و گوهلێبوون و كورهبوونا رهنگان دهێته كرن، چونكی هندهك كولیژه وهكی یا نوشداری چهند پلهیێن وی دبلندبن، ههكه كورهبوونا رهنگان ههبیت یان كێماسیهكا ئهندامی ههبیت ناهێته وهرگرتن.
رێڤهبهرێ بنگههێ زانین یێ ساخلهمیا قوتابخانهیان دیاركر ژی كو ب تنێ دهرچوویێن شهشێ ئامادهی ئهوێن ل كولیژه و پهیمانگههان دهێنه وهرگرتن دێ چنه لیژنا پزیشكی و قوتابیێن دی ههموو دێ ل بنگههان هێنه پشكنینكرن و گۆت:
ئهو قوتابیێن دهێنه وهرگرتن ل پهیمانگههێن پشتی نههێ بنهرهتی دیسان ل بنگههێن نێزیكی پهیمانگههێن خوه دێ هێنه پشكنینكرن.
ههروهسا دیاركر كو خهلكێ مه نوكه یێ پێشكهتی و گرنگیێ ب پشكنینان دكهن و گۆت: گهلهك جارا قوتابی ل كولیژا و خاندنێن بلند ناهێنه وهرگرتن ژ بهرنهبوونا فورمان، ژبهر ڤێ چهندێ فورم یا بوویه تشتهكێ بنهرهتی د ژیانا قوتابیان دا، لهورا ژی فۆرما نوو ژ قۆناغا بنهرهت ههتا زانكۆیێ دێ ل گهل قوتابیان مینیت و قۆناغ بۆ قوناغێ دێ هێته نووكرن و پێزانینێن نوو دێ ل سهر هێنه زێدهكرن.
رێڤهبهرێ سهنتهرێ زانین خواست كو رێڤهبهرێن قوتابخانا ل دووڤ خشتهیهكی قوتابیێن خوه بهنێرنه بنگههان بۆ پشكنینان و گۆت:مه بڕیار دایه كو ههر بنگهههك رۆژانه 50 قوتابیان ب رێڤهببهن و ئهڤ پرۆسه بۆ دهمێ ههیڤ و نیڤان دێ بهردهوام بیت.