ده‌رمان و ئامیرێن تاقیگه‌هێ‌ بۆ سێ‌ هزار نه‌خۆشێن كه‌مپا دومیز دهێنه‌ دابینكرن

رێكخراوا ساخله‌میا جیهانی ب هه‌ڤكاریا رێڤه‌به‌ریا گشتی یا ساخله‌میا دهوكێ‌ رابوون ب دابینكرنا ده‌رمان و ئامیرێن تاقیگه‌هێ‌ بۆ زێده‌تر ژ سێ‌ هزار نه‌خوشان ل كه‌مپا دومیز.
د.رێباز تاهر، به‌رپرسێ‌ نوو یێ‌ نڤیسینگه‌ها هه‌ولێرێ‌ یا رێكخراوا ساخله‌میا جیهانی دیاركر كو ئه‌ڤه‌ پشكه‌كه‌ ژ وان هاریكاریێن رێكخراوا ساخله‌میا جیهانی پێشكێشی كوردێن روژئاڤا دكه‌ن ب هه‌ڤكاری دگه‌ل رێڤه‌به‌ریا گشتی یا ساخله‌میا دهوكێ‌ و گۆت: ئه‌و هاریكاری پێك هاتبوون ژ هه‌شت پارچێن مه‌زن ژ ئامیرێن تاقیگه‌هی و پێدڤیێن وان كو پێك هاتبون ژ چه‌ند تایبه‌مه‌ندیێن جودا جودا وه‌كی (ئامیرێن وه‌رگرتنا خوینێ‌، وه‌رگرتنا نموونێن ئاڤێ‌ ژ دفنێ‌ و گه‌وریێ‌، پشكنینا ده‌ستئاڤێ‌ و... هتد).
به‌رپرسێ‌ رێكخراوا ساخله‌میا جیهانی ئه‌و ژی دیار كر كو  ئامیره‌كێ‌ تایبه‌تمه‌ند ب نه‌خۆشیێن ره‌بوویێ‌ (بهێن ته‌نگی ) دگه‌ل ده‌رمانێن وی ئامیره‌ی، هه‌روه‌سا چار ئامیرێن پشكنینا پاقژیا ئاڤێ‌ و ئامیرێن هاریكار دناڤ كه‌مپێ‌ دا هاتنه‌ دابینكرن و گۆت: دبوارێن ته‌نگاڤیان دا ژی به‌رده‌وام دهاریكارین و بۆ ڤێ‌ جارێ‌ مه‌ ده‌رمان و پێدڤیێن نوژداری بۆ سێ‌ هزار كه‌سان بۆ ده‌مێ‌ هه‌یڤه‌كێ‌ دابینكرینه‌.
هه‌روه‌سا دیاركر ژی كو رێكخراوا ساخله‌میا جیهانی ب هه‌ڤكاری ل گه‌ل رێڤه‌به‌ریا گشتی یا ساخله‌میا پارێزگه‌ها دهۆكێ‌ ل رۆژا 24/8/2013 ز بۆ ده‌مێ‌ حه‌فتیه‌كێ‌ دێ‌ ده‌ست ب سێرڤه‌یه‌كێ‌ كه‌ن بۆ ده‌ستنیشانكرنا وان نه‌خۆشیێن ل ناڤ كه‌مپێ‌ به‌لاڤه‌ و دئه‌نجامێ‌ وێ‌ سێرڤه‌یێ‌ دا ئه‌و دێ‌ شێن پتر نه‌خۆشیان و پێدڤیێن وان ب ده‌رمان و پێدڤیێن نوشداری دابین كه‌ن.