هه‌وا كومكرنا ده‌رمان و پێدڤیێن نوشداری بو كوردێن روژئاڤا ل دهوكێ‌ ده‌ستپێ‌ كر

رێڤه‌به‌ریا گشتی یا ساخله‌میا پارێزگه‌ها دهۆكێ‌ راگه‌هاند كو ئه‌و دێ‌ ده‌ست ب هه‌وه‌كا كۆمكرنا ده‌رمان و پێدڤیێن نوشداری كر بۆ په‌نابه‌رێن رۆژئاڤێ‌ كوردستانێ‌.
د.نزار عسمه‌ت، رێڤه‌به‌رێ‌ گشتیێ‌ ساخله‌میا دهوكێ‌ دیاركر ل دۆف ده‌ستپێشخهریا سه‌رۆكێ‌ هه‌رێما كوردستانێ‌، وه‌زاره‌تا ساخله‌میا هه‌رێمێ‌ رابوویه‌ ب هه‌وه‌كا كۆمكرنا ده‌رمان و پێدڤیێن نوشداریێ‌ ل هه‌ر سێ‌ پارێزگه‌ها و گۆت: ل دهۆكێ‌ ئه‌ڤ هه‌وه‌ مه‌ راگه‌هاند و مه‌ داخواز ژ هه‌موو كومپانی و نه‌خۆشخانێن تایبه‌ت و خودان كوگه‌هێن ده‌رمانا و نه‌خۆشخانێن كه‌رتێ‌ گشتی ژی كر ئه‌ڤرۆ پشكداری ڤێ‌ هه‌وێ‌ ببن  و مه‌ لیژنه‌ك پێكئینایه‌ بۆ دروستكرنا لیسته‌یان و لیسته‌ دێ‌ هێنه‌ هنارتن بۆ هه‌مو كوگه‌ها و نه‌خوشخانا هه‌ر ئێك ل گوره‌ی شیانێن خوه‌ دێ‌ ڤان كه‌ره‌ستا ئینن و دێ‌ هێنه‌ كۆمكرن ل كوگه‌هێن پشكا ده‌رمانسازی و پشتی هینگێ‌ دێ‌ ئالیه‌ته‌ك هێته‌ دانان بو هنارتنا ڤان پشته‌ڤانیا بو وان جهێن پێدڤی، ئانكو ئه‌ڤ ئاواره‌ ل كیرێ‌ بن دێ‌ بۆ هێنه‌ هنارتن چ ل دهوك یان هه‌ولێر یان سلێمانی.
دیاركر ژی كو هنده‌ك كومپانی ده‌ستپێشخه‌ربوون بو كۆمكرنا پارا و ئه‌و پاره‌ دێ‌ هێنه‌ كۆمكرن و ئالیه‌ته‌ك دێ‌ هه‌بیت بۆ كرینا ده‌رمانا و پێدڤیێن نوشداری بو وان پارا و هه‌مان ئالیه‌ت جاره‌كادی بهێته‌ په‌یره‌و كرن.