گرێبه‌ستا ئاڤاكرنا نه‌خۆشخانا ده‌ڤه‌را ئامێدیێ‌ هاته‌ ئیمزاكرن

ب مه‌ره‌ما ده‌ست ب ئاڤاكرنا نه‌خۆشخانا 100 ته‌ختی ل ده‌ڤه‌را ئامێدیێ‌، رێڤه‌به‌ریا گشتی یا ساخله‌میا پارێزگه‌ها دهۆكێ‌ و كومپانیا ڤینس گرێبه‌سته‌ك ئیمزاكر.
د.نزار عسمه‌ت، رێڤه‌به‌رێ‌ گشتێ‌ ساخله‌میا پارێزگه‌ها دهوكێ‌ دیاركر كو هه‌موو لاپه‌رێن فه‌رمی یێن گرێبه‌ستا ئاڤاكرنا نه‌خوشخانا 100 ته‌ختی ل ده‌ڤه‌را ئامێدیێ‌ بدووماهی هاتن دگه‌ل كومپانیا ڤینس و گۆت: نه‌خۆشخانا ده‌ڤه‌را ئامێدیێ‌ دێ‌ نه‌خوشخانه‌كا سه‌رده‌میانه‌ بیت، دكه‌ڤیته‌ ده‌ڤه‌را ده‌شتا زێی و دێ‌ هه‌موو ده‌ڤه‌رێ‌ بخوڤه‌ گریت و هه‌موو خه‌لكێ‌ وان ده‌ڤه‌را دێ‌ سودمه‌ندبن ژ ڤێ‌ نه‌خوشخانێ‌، دیاركر ژی كو ئه‌ڤ پروژه‌ دێ‌ د ماوێ‌ دو سال و نیڤان دا ب دووماهی هێت ز كوژمێ‌ 45 ملیار دینارێن ئیراقی بۆ هاتینه‌ ته‌رخانكرن ژلایێ‌ حكوومه‌تا هه‌رێما كوردستانێ‌ ڤه‌.
ژلایێ‌ خوڤه‌ صه‌باح ملحه‌م خودانێ‌ كومپانیا ڤینس گۆت: هه‌موو كارێن دیزاینا پروژه‌ی ب دووماهی هاتینه‌ و دێ‌ ده‌ست ب ئاڤاكرنێ‌ هێته‌ كرن، به‌ری نوكه‌ چه‌ند ئه‌زموون مه‌ هه‌نه‌ دگه‌ل نه‌خوشخانا ئاكرێ‌ و زاخۆ،  دێ‌ د وه‌ختێ‌ خوه‌ دا هێته‌ ئاڤاكرن پشتی دیزاینێ‌ كاری دێ‌ ب رێك و پێك برێڤه‌ چیت.