پشتی دیاربوونا نه‌خۆشیا فالنجا زارۆیان ل وه‌لاتێ‌ سۆریایێ‌ ساخله‌میا دهۆكێ‌ دێ‌ پێرابوونێن خوه‌ دژوارتر لێ‌ كه‌ت

ژبو كونترولكرنا نه‌خوشیا فالنجا زارویان ل هه‌رێما كوردستانێ‌ و پشتی دیاربوونا چه‌ند حاله‌تێن نه‌خۆشیا ناڤبری ل وه‌لاتێ‌ سوریایێ‌ رێڤه‌به‌ریا كارۆبارێن خوپاراستنا ساخله‌میێ‌ دێ‌ ب چه‌ند پێرابوونان رابیت و دێ‌ ده‌ست ب قۆناغا دوێ‌ یا هه‌وا ڤاكسیندانێ‌ كه‌ت.

د. سیروان محه‌مه‌د ئه‌سوه‌د، رێڤه‌به‌رێ‌ كارۆبارێن خوپاراستنا ساخله‌میێ‌ ل دهۆكێ‌ دیاركر كو چه‌ندین حاله‌تێن فالنجا زارۆیان ل ده‌ڤه‌را دێرزور یا وه‌لاتێ‌ سۆریایێ‌ ده‌ركه‌فتینه‌، ژبه‌ركو ئه‌ڤ نه‌خۆشیه‌ یا ڤایرۆسی یه‌ و ب رێكا  پیساتیێ‌ دچیته‌ دناڤ له‌شێ‌ مروڤیدا و دهێته‌ ڤه‌گوهاستن ژ ئێكی بو ئێكێ‌ دی له‌ورا ئه‌و دێ‌ پێرابوونێن خوه‌ ژدوارتر لێ‌ كه‌ن و گۆت: ئه‌ڤه‌ چه‌ندین ساله‌ ئه‌ڤ نه‌خۆشیه‌ ل عیراقێ‌ و وه‌لاتێن ده‌ور وبه‌ر هاتیه‌ بنبركرن , به‌لێ‌ ژبه‌ر وان كاودانێن نوكه‌ وه‌لاتێ‌ سوریا تێدا ئه‌ڤ حاله‌ته‌ په‌یدابووینه‌ ڤه‌، له‌ورا وه‌زاره‌تا ساخله‌میا هه‌رێما كوردستانێ‌ لیژنه‌كا بلند یا پێكئینای ب سه‌روكاتیا وه‌زیرێ‌ ساخله‌میێ‌ و ئه‌ندامه‌تیا رێڤه‌به‌رێن كاروبارێن خوپاراستنێ‌ ل هه‌ر سێ‌ پارێزگه‌هێن هه‌رێمێ‌, ئه‌م وه‌ك رێڤه‌به‌ریا خوپاراستنێ‌ دێ‌ رابین ب هه‌وه‌كا ڤاكسیندانێ‌ دژی فالنجا زارویان بو زارویێن ئێك روژی تا پێنج سالی كو ل روژا شه‌مبیا بهێت 2/11/2013 دێ‌ ده‌ست پێكه‌ت و بۆ ده‌مێ‌ پێنج رۆژان دێ‌ یا به‌رده‌وام بیت و نێزیكی 180 هزار زارۆیان دێ‌ هێنه‌ ڤاكسیندان و تیمه‌ك به‌رده‌وام دێ‌ ل خالا سنوری بیت ل پێشابیرێ‌ بو وه‌لاتیێن سۆری یێن ده‌ربازی هه‌رێمێ‌ دبن و دێ‌ هێنه‌ ڤاكسیندان دژی ڤێ‌ نه‌خوشیێ‌.

د.سیروان ئه‌وژی دیاركر كو د گه‌را ئێكێ‌ یا هه‌وا ڤاكسیندانێ‌ دا ب رێژا 97% ژ زارۆیان هاتبوونه‌ ڤاكسیندان و گۆت: ژوانژی پتری 5500 زارۆیێن كوردێن  روژئاڤا ل دهۆكێ‌ ڤاكسین وه‌رگرتبوو.