ب كوژمێ ملیاره‌ك و 500 ملیون دیناران پرۆژێن ساخله‌میێ ل ئامێدیێ دهێنه ڤه‌كرن
هاتیه بلاڤکرن روژا جارشه‌مبێ, 27 چریا دووى 2013 - 2:33pm
شانده‌كێ ساخله‌میێ ب سه‌رۆكاتیا رێڤه‌به‌رێ گشتیێ ساخله‌میا پارێزگه‌ها دهۆكێ سه‌ره‌دانا ده‌ڤه‌را ئامێدیێ كر و دچه‌ند كۆمبوونێن جودا دا بڕیار دان كێماسیێن ده‌زگه‌هێن ساخله‌میێ بهێنه چاره‌سه‌ركرن و ب كوژمێ ملیاره‌ك و 500 ملیونان پرۆژێن ساخله‌میێ هاتنه ڤه‌كرن و بڕیاره بنگه‌هه‌كێ تایبه‌ت بۆ خێزانێن شه‌هید و ئه‌نفالكریان بهێته ڤه‌كرن.
ب چاڤدێریا حسێن چه‌لكی، قایمقامێ قه‌زا ئامێدیێ رۆژا 26/11/2013 ژماره‌كا پرۆژێن ساخله‌میێ ل ده‌ڤه‌را ئامێدیێ هاتنه ڤه‌كرن.
د.نزار عصمه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو د سه‌ره‌دانا وان دا چه‌ند داخوازی هاتینه‌كرن بو پێشڤه‌برنا كه‌رتێ ساخله‌میێ ل ئامێدیێ و گۆت: هه‌موو داخازی دگرنگ بووینه كو هنده‌ك هاتنه چاره‌سه‌ركرن و هنده‌ك ژێ هاتینه دانان دپلانێن رێڤه‌به‌ریا گشتی ساخله‌میا دهوكێ وه‌كو دابینكرنا نوشدارێن تایبه‌تمه‌ند.
د.نزار عصمه‌ت دیاركر ژی كو چه‌ند پرۆژه هاتنه ڤه‌كرن كو پێكهاتیبوون ژ خانیێن نوشدار و په‌رستاران و هه‌روه‌سا نوشداریا داد و ئاڤاهیێ تیشك و سونارێ كو ل گه‌ل دابینكرنا ئامیره‌یان كوژمێ ملیاره‌ك و 500 ملیون دیناران لێ هاتینه مه‌زاختن.
ژلایه‌كێ دیترڤه بڕیاره بنگه‌هه‌كێ ساخله‌میێ یێ تایبه‌ت بۆ چاره‌سه‌ركرنا خێزانێن شه‌هید و ئه‌نفالكریان بهێته ڤه‌كرن.
د,نه‌جیب سه‌عید، رێڤه‌به‌رێ ساخله‌میا ئامێدیێ دیاركر كو هه‌موو ئاماده‌كاری بۆ بنگه‌هێ ناڤبری هاتینه كرن و گۆت: بڕیاره كار ل بنگه‌هێ ناڤبری بهێته كرن و بۆ قوناغا ئێكێ كه‌سانێن پله ئێك یێن شه‌هید و ئه‌نفالكریان دێ لێ هێنه چاره‌سه‌ركرن.
رێڤه‌به‌رێ ساخله‌میا ئامێدیێ دیاركر ژی كو 1982 خێزان دێ مفای ژ خزمه‌تێن وی بنگه‌هی وه‌رگرن و بۆ هه‌ر خێزانه‌كێ كارته‌ك دێ هێته دروستكرن و گۆت: دایك و باب و خێزان و زارۆیێن شه‌هیدان دێ شێن رۆژانه ل ده‌مژمێر سێ هه‌تا پێنجێ ئێڤاری سه‌ره‌دانا بنگه‌هێ ناڤبری كه‌ن.
ئه‌ڤ مالپه‌ره فرێکه
