40 په‌رستار بۆ ده‌مێ سێ هه‌یڤان دێ ل تۆركیا راهێنانێ كه‌ن
هاتیه بلاڤکرن روژا دوو شه‌مبێ, 2 کانونا بچیک 2013 - 9:05pm
ل دووڤ پلانا رێڤه‌به‌ریا گشتی یا ساخله‌میا پارێزگه‌ها دهۆكێ و ل سه‌ر بۆدجا پارێزگه‌ها دهۆكێ بڕیاره 40 كارمه‌ندێن ساخله‌میێ بۆ ده‌مێ سێ هه‌یڤان قه‌ستا وه‌لاتێ تۆركیا بكه‌ن بۆ راهێنانێ ل سه‌ر نووترین شێواز و ئه‌تكێتێن په‌رستاریێ ل وه‌لاتێ ناڤبری.
د. نزار عصمت، رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو وان گرێبه‌سته‌ك ل گه‌ل زانكۆیه‌كا توركی ئیمزاكر ، داكو شیانێن زانستی یێن په‌رستارا د وارێ زاروكبوونێ و هه‌وارهاتنێ دا بلندبكه‌ن و گۆت: ئه‌ڤ په‌رستارێن هاتینه هه‌لبژارتن لسه‌ر بنه‌مایێ زانستی كو بشێن باش فێر ببن و بشێن وێ خزمه‌تێ بیننه كوردستانێ، هه‌روه‌سا هه‌ڤالێن خوه ژی فێر بكه‌ن.
د.نزار عصمه‌ت، دیاركر ژی كو ئه‌ڤه ئێك ژ به‌رنامه‌یێن پشته‌ڤانیا راسته‌وخو یا پارێزگه‌ها دهوكێ یه كو ئه‌م بشێن پتر گرنگیێ ب په‌رستارا بده‌ین و شیانێن وان بلندتر لێ بكه‌ین، داكو خزمه‌تێن ساخله‌میێ ل دووڤ پێدڤيێن خه‌لكێ مه بن.
سه‌لین كۆتای، ژ شیره‌تكاریێن رۆژهه‌لاتا ناڤه‌راست كو دێ ڤی كاری ب ستویێ خوه ڤه گرن دیاركر كو كارێ په‌رستاریێ و رولێ وان دناڤ نه‌خوشخانادا زور یا گرنگه و چ كار بیێ وان ناهێنه‌كرن و گۆت: كارێ په‌رستاریێ چ كێمترنینه ژ كارێ نوشداری له‌ورا دێ گرنگیه‌كا باش پێده‌ین و ئه‌و تشتێ مه ل توركیا هه‌ی وه‌ك زانستیا په‌رستاریێ دێ نیشا وان ده‌ین داكو ئه‌وژی لڤێره كاری پێ بكه‌ن.
یوسف حسێن، هاریكارێ رێڤه‌به‌رێ گشتی بۆ كارۆبارێن كارمه‌ندێن ساخله‌میێ دیاركر كو پرۆسا هنارتنا په‌رستار و كارمه‌ندێن ساخله‌میێ ب مه‌ره‌ما راهێنانێ بۆ ده‌رڤه‌ی وه‌لاتی دێ یا به‌رده‌وام بیت و گۆت: ئه‌ڤرۆ 1/12/2013 په‌رستارێن ته‌نگاڤیا و زارۆبوونێ دێ هێنه هنارتن كو ژمارا وان 15 په‌رستارن و پاشان گه‌را دووێ كو 25 په‌رستارن دێ هێنه هنارتن.
ئه‌ڤ مالپه‌ره فرێکه
