٨٥% ژ خەلکی دبینن نەخۆشخانە دپێگیرن ب پێشکێشکرنا خزمەتێن ساخلەمیێ

پەیمانگەھا دھۆک بۆ پرسێن سیاسی ب ھەڤکاری ل گەل رێڤەبەریا گشتی یا ساخلەمیا پارێزگەھا دھۆکێ و ژپێخەمەت باشترکرنا جۆرێ خزمەتێن ساخلەمیێ رابوون ب ئەنجامدانا کونفرانسەکی و راگەھاندنا ئەنجامدانا راپرسیێن کو دوارێ ساخلەمیێ دا ھاتینە کرن.

شڤان عیسا، بەرپرسێ پەیمانگەھا دھۆک بۆ پرسێن سیاسی دیارکر کو وان ب ھاریکاریا فەرمانگەھا رێکخراوێن نەحکوومی و ب ھەڤکاری ل گەل رێڤەبەریا گشتی یا ساخلەمیا پارێزگەھا دھۆکێ دەست ب پرۆژەکی کربوو کو چەند قۆناغان پێک ھاتبوو وەک وەرگرتنا پێزانینان ل سەر کەرتێ ساخلەمیێ و  ئەنجامدانا راپرسیەکێ کو ژ ٢١ پرسیاران پێکھاتبوو ل دۆر کاودانێن ساخلەمیێ کو ل دەڤەرێن دھۆک و زاخۆ و ئاکرێ وەسا دیاربوو کو ٨٥% ژ خەلکی دبینن نەخۆشخانە یا پێگیرە ب پێشکێشکرنا خزمەتێن ساخلەمیێ و ٧٤% دبینن نەخۆشخانە خەمخورن ژبۆ پێشکێشکرنا خزمەتان ژ دەستپێکێ ھەتا دووماھیێ و دیسا ٧٢% دبێژن ھەموو بسپوری ل نەخۆشخانا ھەنە.

ل ھەمبەر ڤێ چەندێ دیارکر ژی کو ھندەک کێماسی ھەنە ژوانژی ٥٧%ژ نەخۆشان دبێژن نەخۆشخانە رانابیت ب بەرسڤدانا گازندە و کێشەیێن نەخۆشان و ٤٢% ژ نەخۆشان دوێ باوەرێ دانە کو نەخۆشخانە نھێنی و پێزانینان ناپارێزیت و ٤٦% ژی دبینن کو نەخۆشخانە داب و نەریتێن جڤاکی ل بەرچاڤ وەرناگرن.

د.نزار عسمەت، رێڤەبەرێ گشتیێ ساخلەمیا پارێزگەھا دھۆکێ دیارکر کو رێکخراوێن جڤاکێ مەدەنی گرنگیەکا مەزن ھەیە و گۆت: ب ھەڤکاری ل گەل وان مە پرۆژە ھەنە کو خزمەتێن ساخلەمیێ باشتر لێ بکەین و کێماسیان دەستنیشان بکەین.

دیارکر ژی کو ل پاشەرۆژێ ژی دێ وان پرۆژەیێن ب ڤی رەنگی ھەبن کو خەلکەک پشکداربیت د ھەلسەنگاندنا ساخلەمیێ دا و ل سەر وی بنەمای پرۆژە دێ بۆ خەلکی ھێنە دارێتن و دبەرسڤا پرسیارەکێ دا کو پتریا راپرسیێ دخزمەتا کەرتێ ساخلەمیێ دا بوویە گۆت: مە مایتێکرن ل ئەنجامان نەکریە و پەیمانگەھێ ب ئازادانە کارێ خوە دناڤ نەخوشخانەیان دا ئەنجامدایە.

ل دۆر سیستەمێ ساخلەمیێ ژی گۆت: سیستەمێ ساخلەمیێ سیستەمەکێ تێکەلە، ئانکو سیستەمێ گشتی و کەرتێ تایبەت پێکڤە کاردکەن و نوشدار دشێت وانا ل کولیژێ بێژیت و ل گشتی و تایبەت کاربکەت، ئەڤە ھەموو دخزمەتا خەلکی دانینە و وەزارەتا ساخلەمیێ و حکوومەتا ھەرێمێ کار د چاکسازیکرنا ڤی سیستەمی دا دکەن.