پرۆفیسورەکێ ئیتالی: پشتی سال و نیڤێن دی ھەموو نشتەرگەریێن دلی ل دھۆکێ دێ ھێنە کرن

 پرۆفیسورەکێ ئیتالی:

پشتی سال و نیڤێن دی ھەموو نشتەرگەریێن دلی ل دھۆکێ دێ ھێنە کرن

دپرێس کونفرانسەکی دا ل دۆر چالاکی و کارێن شاندێ نوشدارێن ئیتالی ل دھۆکێ دیاردبیت کو سەنتەرێ ئازادی یێ نەخۆشی و نشتەرگەریێن دلی قۆناغێن مەزن دەربازکرینە و ل نێزیک ھەموو نشتەرگەری دێ لێ ھێنە کرن.

د. سەردار غازی، تایبەتمەندێ نەخۆشیێن دلی یێن زکماکی یێ، زارۆیان دیارکر کو تیمەکێ پزیشکی یێ ئیتالی ئەڤە بۆ دەمێ سێ رۆژانە ل پارێزگەھا دھۆکێ کاردکەت و گۆت: ھەتا نوکە ئەو شیاینە شەش نشتەرگەریێن ڤەکرنا سینگی بۆ ئەنجامدانا نشتەرگەریێن دلی ل گەل ٢٠ قەستەرێن دلی بۆ زارۆیان ئەنجام بدەن و بڕیار ئەوە ھەتا کارێ وان ب دووماھی دھێت ١٢ نشتەرگەریێن مەزن ل گەل ٣٥ قەستەران ل دھۆکێ بکەن.

پروڤیسور ئەلیساندرو جامبێرتی، سەرۆکێ شاندێ پزیشکی یێ ئیتالی دیارکر کو پشتی بورینا سال و نیڤێن دی سەنتەرێ ئازادی یێ نەخۆشی و نشتەرگەریێن دلی دێ یێ بەرھەڤ بیت کو ئەو بخو ڤان جورە کریارا ئەنجام بدەت و گۆت: سەنتەرێن تایبەتمەند پێدڤی ب چەند نوشدار و کارمەندێن ساخلەمیێ ھەیە بو ئەنجامدانا ڤان جورە نشتەرگەریا، ١٠ ژ نوشدار و کارمەندێن ڤی سەنتەری چووینە وەلاتێ ئیتالیا بو راھێنانا و ب رێژا ٩٠% دێ ڤان نشتەرگەریا ئەنجام دەت.

ھەروەسا دیارکر ئەو شیاینە چار نشتەرگەریێن مەزن و دەگمەن ڤێ جارێ ئەنجام بدەن و گۆت: ھەکە نەھاتبانە کرن ئەو زارۆ دا گیانێ خوە ژدەست دەن و تشتێ جیاواز ڤێ جارێ ئەوبوویە نوشدار و ستافێ ساخلەمیا دھۆکێ پشکداری ھەموو نشتەرگەریان بوون ئەوێن ژلایێ ئەندامێن شاندێ نوشدارێن ئیتالی ھاتینە ئەنجامدان.