دۆرێن 500 گولچیسكان ل دهۆكێ هاتینه چاندن
هاتیه بلاڤکرن روژا پێنج شه‌مبێ, 13 ئادار 2014 - 9:50am
ب مه‌ره‌ما به‌لاڤكرنا هشیاریا ساخله‌میێ ل دۆر نه‌خۆشیێن گولچیسكا، رۆژا جیهانی یا نه‌خۆشیێن گولچیسكان ل نه‌خوشخانا هیڤی یا زارۆیان هاته ساخكرن.
ل ده‌ستپێكێ بابه‌تێن شووشتن و چاندنا گولچیسكان و كارتێكرنا نه‌خۆشیێن ڤه‌گر ل سه‌ر نه‌خۆشێن گولچیسكان و چه‌ند ئامار ل دۆر نه‌خۆشیان هاتینه گه‌نگه‌شه‌كرن و پاشان د.نزار عصمه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو مه‌ره‌م ژ ساخكرنا رۆژێن ساخله‌میا جیهانی یا هه‌ر نه‌خوشیه‌كێ ئه‌وه كو پتر پووته‌دان ب ره‌وشا ساخله‌میا وه‌لاتیان بهێته دان و هه‌موو ته‌خێن جڤاكی ل دۆر نه‌خوشیێ هشیارببن و ببنه رێیه‌ك بۆ كێمكرنا نه‌خۆشیان ژلایه‌كیڤه و خوپاراستن ژ نه‌خۆشیان ژلایه‌كێڤه دیترڤه.
د. عبدوللا سه‌عید، شیره‌تكارێ نشته‌رگه‌ریا گشتی و چاندنا گولچیسكا دیاركر كو نه‌خوشیێن گولچیسكا ل هه‌موو جیهانێ گه‌له‌ك د به‌لاڤه‌نه و چاره‌سه‌ریێن وان جورا و جورن و ل دهۆكێ دو جورێن چاره‌سه‌ریێ دهێنه دان ئه‌وژی شووشتن و چاندنا گولچیسكانه و گۆت: چاندنا گولچیسكا كاره‌كێ نوویه ل كوردستانێ ژ سالا 2004 وه‌ره ده‌ستپێكریه سێ سه‌نته‌ر هه‌نه ل دهۆك، هه‌ولێر و سلێمانی ئه‌ڤ سه‌نته‌ره روژانه ب كارێ چاندنا گولچیسكا رادبن و هه‌تا نوكه نێزیكی 2000 گولچیسكان هاتینه چاندن كو پتر ژ هزار گولچیسكان ل هه‌ولێرێ و دورێن 500 ژی ل دهۆكێ و یێن دیتر ژی ل سلێمانیێ هاتینه چاندن و رێژا سه‌ركه‌فتنا وان پتر بوویه ژ 95% و ژ هه‌موو ده‌ڤه‌رێن عیراقێ سه‌ره‌دانا ڤان سه‌نته‌ران دكه‌ن.
د. شاكر سه‌لیم، رێڤه‌به‌رێ سه‌نته‌رێ شووشتن و چاندنا گولچیسكا دیاركر كو ل دهۆكێ 20 ئامیرێن نشته‌گه‌ریا گولچیسكان و دو یێن شكاندنا به‌ركێن گولچیسكان هه‌نه و گۆت: مه نێزیكی 80 نه‌خۆشان هه‌نه كو به‌رده‌وام چاره‌سه‌ریا وان دهێته كرن و رێژا تووشبوونێ ب نه‌خۆشیێن گولچیسكان د زێده‌بوونێ دایه.
ئه‌ڤ مالپه‌ره فرێکه
