ساخله‌میا دهوكێ‌ سێ‌ گرێبه‌ست ل گه‌ل رێكخراوێن نه‌ حكومی ئیمزا كرن

بۆ جارا ئێكێ‌ رێڤه‌به‌ریه‌كا حكومی ل گه‌ل سێ‌ رێكخراوێن نه‌ حكومی ( ئنستیوتا دهۆك بۆ روشه‌نبیریا گشتی و رێكخراوا تانكا هزران و هاریكار) سێ‌ گرێبه‌ست ئیمزاكرن بۆ دووڤچۆنا كاری و زانینا ره‌وشا ساخله‌میێ‌ ل ناڤ خه‌لكه‌كی، داكو پلان ل دووڤ پێدڤی و داخازێن خه‌لكی بهێنه‌ دارێتن.
رێڤه‌به‌رێ‌ گشتی یێ‌ ساخله‌میا پارێزگه‌ها دهوكێ‌ د.نزارعسمت داخواز ژ سازیێن جڤاكێ‌ مه‌ده‌نی كر هاریكاربن بو كۆمكرنا زانیاریان و هه‌لسه‌نگاندنا كاری ژ بو جوانی و رێك و پێكیا دارێشتنا پلانا ستراتیژیا وێ‌ رێڤه‌به‌ریا كار ژ بۆ دكه‌ن و گۆت: سازیێن جڤاكێ‌ مه‌ده‌نی هه‌می ده‌ما سه‌ربه‌خویی و بێ‌ لایه‌نی كاردكه‌ن، ژبه‌ر هندێ‌ ژی ئه‌و پێزانینێن ئه‌و دگه‌هیننه‌مه‌ هه‌موو ئه‌و پێزانینێن راسته‌قینه‌نه‌ و ده‌ربرینێ‌ ژ كه‌توارێ‌ مه‌ یێ‌ نوكه‌ دكه‌ن، و ل سه‌ر وان پێزانینا دێ‌ پلانێ‌ دارێژین و د وێ‌ باوه‌ریێ‌ دانه‌ دێ‌ پلانه‌كا باش بیت.
سه‌رۆكێ‌ ئه‌نیستیوتا دهۆك بۆ ره‌وشنبیریا گشتی عه‌بدولعه‌زیز محسن دیاركر كو ل دووڤ  باوه‌ریا رێڤه‌به‌ریا گشتی یا ساخله‌میا پارێزگه‌ها دهۆكێ‌ دایه‌ وان ئه‌و ل دووڤ ستانداره‌كێ‌ نیڤده‌وله‌تی دێ‌ ب وه‌رگرتنا راوبوچوونێن خه‌لكی رابن و گۆت:ئه‌م دێ‌ پێدڤی و داخوازیێن خه‌لكی وه‌رگرین و ل دووڤ وان دێ‌ پلان هێته‌ دارێتن، ئه‌ڤه‌ژی ژ كارێن سه‌رده‌مانه‌یه‌، و گه‌له‌ك جاران رێكخراوێن جڤاكێ‌ مه‌ده‌نی ب چاڤێن گومانێ‌ به‌رێ‌ خوه‌ د ده‌نه‌ سازیێن حكومی، هه‌مان شێوه‌ حوكمه‌ت ژی، لێ‌ ئه‌ڤرۆ كه‌به‌لگه‌یه‌كێ‌ زیندی یێ‌ د ده‌ستێ‌ مه‌ هه‌موویان دا كو باوه‌ری دناڤبه‌را سازیه‌كا حكومی و سازیه‌كا نه‌حكومی دا په‌یدابویه‌ بو ئه‌نجامدانا كاره‌كی، ئه‌و كار ژی ده‌رئه‌نجام دێ‌ بو خه‌لكی بیت.
به‌رپرسێ‌ رێكخراوا هاریكار صه‌لاح به‌رواری دیاركر كو  ئێك ژ بنه‌مایێن شه‌فافیه‌تێ‌ ئه‌وه‌ رێڤه‌به‌ریه‌كا حكومی بێژیته‌ هنده‌ك لایه‌نێن دی داتا بو كۆم كه‌ت و هه‌لسه‌نگاندنا كارێ‌ وان بكه‌ت و ل دووماهیێ‌ خه‌لك دێ‌ مفاداربیت.