بۆ جارا ئێكێ 25 زارۆیێن ئاریشێن زكماكی د ده‌ڤ و لێڤان دا هه‌ین چاره‌سه‌ربوون
هاتیه بلاڤکرن روژا پێنج شه‌مبێ, 8 گولان 2014 - 10:01am
رێڤه‌به‌ریا گشتی یا ساخله‌میا پارێزگه‌ها دهۆكێ ب هه‌ڤكاری ل گه‌ل رێكخراوا هیڤی نازدار یا زارۆیان و شانده‌كێ نوشدارێن ئیتالی رابوون ب چاره‌سه‌ركرنا وان زارۆیێن كو د زكماكدا لێڤێن وان نه‌گه‌هشتینه ئێك یان پانیا ده‌ڤی نه‌بیت و دۆرێن 60 زارۆیان ژی هاتنه دیتن و پشكنینكرن.
د پرێس كونفرانسه‌كی د اكو ل نه‌خۆشخانا هیڤی یا زارۆیان هاته ئه‌نجامدان، د.نزار به‌كر، رێڤه‌به‌رێ نه‌خۆشخانا هیڤی دیاركر كو د چار رۆژێن بۆری دا شانده‌كێ نوشدارێن ئیتالی شیا 25 نشته‌رگه‌ریان بۆ وان زارۆیان ل سه‌نته‌رێ نشته‌رگه‌ریا زارۆیان ئه‌نجام بده‌ت و گۆت: دۆرێن 60 زارۆیان ژلایێ تیمێ نوشدارێن ئیتالی هاتبوونه دیتن و بۆ جارێن بهێت هژماره‌كا دی یا نشته‌رگه‌ریان دێ هێنه كرن.
دیاركر ژی ژبلی ڤان نشته‌رگه‌ریان، تیمێ نوشدارێن ئیتالی رادبیت ب چاره‌سه‌ركرنا نه‌خۆشێن خوینێ و دلی ئه‌وێن ل هه‌رێمێ چاره‌سه‌رنه‌بن و گۆتژی: ل دووڤ رێكه‌فتنا رێڤه‌به‌ریا گشتی یا ساخله‌میا پارێزگه‌ها دهۆكێ و رێكخراوا هیڤی نازدار، سالانه سێ جاران نوشدارێن تایبه‌تمه‌ند د وارێن جودا جودا دا سه‌ره‌دانا پارێزگه‌ها دهۆكێ دكه‌ن.
سه‌رۆكێ تیمێ نوشدارێن ئیتالی، د. ئه‌نتونیو دیاركر كو سه‌ره‌دانێن وان ب پشته‌ڤانیا وه‌زاره‌تا ده‌رڤه یا وه‌لاتێ ئیتالیا دهێنه كرن و گۆت: مه‌ره‌ما مه ئه‌وه هاریكاریێ بكه‌ین بۆ پێشڤه‌برنا ئاستێ زانستی و ئێك ژوان واران ژی ئه‌وه ئه‌و زارۆیێن نوو دهێنه ل سه‌ر دونیایێ و نه‌خۆشیا ته‌لاسیمیا هه‌بیت پلانه‌ك هه‌بیت بۆ كونترۆلكرنا وێ و دیسا ئامیرێن به‌نكا خوینێ و پشكێن گرێدای نه‌خۆشیێن خوینێ و ژنان و زارۆبوونێ پێشڤه‌ببه‌ین، ل گه‌ل ڤێ چه‌ندێ ئاریشێن لێڤا و گه‌وریێ یێن گرێدای ئه‌گه‌رێن زكماكی چاره‌سه‌ربكه‌ین.
سه‌روكێ رێكخراوا دوه‌لی یا ئیتالی بۆ پێشكێشَكرناخزمه‌تێن نشته‌رگه‌ریان، د. فابیو دیاركركو وی سه‌ره‌دانا گه‌له‌ك باژێرێن عیراقێ كریه، به‌لێ هه‌ڤكاری و هاریكاریا ل دهۆكێ هاتیه دیتن ل چ وجهێن دی نه‌بوویه و گۆت: مه‌ره‌ما سه‌ره‌كی ژ پروگرامێ مه ئه‌وه پشتی ئه‌م ب دووماهی دهێیین ل دهۆكێ ژی تیمه‌ك بهێته ئاماده‌كرن كو ئه‌و ب خوه ب ڤی كاری راببن و سه‌نته‌ره‌كێ تایبه‌تمه‌ند بۆ ڤێ مه‌ره‌مێ هه‌بیت و نوكه ئه‌م د پێنگاڤا ئێكێ داینه د ڤی واری دا.
| هەڤپێج | الحجم |
|---|---|
| resized_team It.jpg | 26.04 كيلوبايت |
ئه‌ڤ مالپه‌ره فرێکه
