ل دهوکێ توشبویێن فالنجی زارو دژی نەخوشیا فالنجا زارویان ڤاکسیندان

گه‌را سیێ یا هه‌وا ڤاكسیندانێ دژى نه‌خۆشیا فالنجا زارۆیان ب چاڤدێریا به‌هزاد عه‌لى ئاده‌م، جێگرێ پارێزگارێ دهۆكێ و ب ئاماده‌بووا رێڤه‌به‌رێن گشتى یێن ساخله‌میێ و په‌روه‌ردێ ب هژماره‌كا چالاكیان ژلایێ زارۆیێن باخچێ سیما و قوتابیێن قوتابخانا چارستین ب ئاماده‌بوونا هژماره‌كا تووشبۆیێن فالنجێ ده‌ستپێكر.

د. سیروان محه‌مه‌دئه‌سود، رێڤه‌به‌رێ كاروبارێن خوپاراستنا ساخله‌میێ دیاركر كو  فالنجا زارۆیان ب رێیا ڤایروسه‌كى ژمروڤه‌كى بو ئێكێ دى دهێته‌ ڤه‌گوهاستن و گۆت: ب مخابنیڤه‌ پشتى روودانێن وه‌لاتێ سوریا، حاله‌ته‌كێ ڤێ نه‌خوشیێ ل گه‌ل گومانلێكریه‌كى ل پایته‌ختێ عیراقێ ده‌ركه‌فتینه‌، له‌ورا رێكخراوا ساخله‌میا جیهانى عیراق كریه‌ ئێك ژ ده‌ه وه‌لاتێن مه‌ترسیدار و ره‌وشا نه‌ئاسایى لێ راگه‌هاندیه‌.

دیاركر ژى كو ل دووڤ پلانا رێڤه‌به‌ریا گشتى یا ساخله‌میا پارێزگه‌ها دهۆكێ ده‌ست ب هه‌وێن ڤاكسیندانێ دهێته‌ كرن، چونكو تاكه‌ رێكه‌ بۆ پاراستنا زارۆیان ژ ڤێ نه‌خۆشیێ و گۆت: بۆ جارا ئێكێ ل ڤێ هه‌وێ دێ نیشانه‌كێ ل تلا زاروكى كه‌ین داكو دوباره‌ نه‌هێته‌ ڤاكسیندان. 

د. لوما حازم به‌رپرسا چاڤدێریا دایك و زارۆیان دیاركر كو ئارمانج ئه‌وه‌ ل ڤێ هه‌وێ 180 زارۆیێن ئێك رۆژى هه‌تلا پێنج سالى ڤاكسینێ وه‌ربگرن، زێده‌بارى  10 هزار زارۆیێن كه‌مپا دومیز و گۆت: 508 تیم دێ ب ڤى كارى رابن و رێژا تیمان ل هه‌مبه‌ر هه‌وێن به‌رى نوكه‌ هاتیه‌ زێده‌كرن و پێدڤیه‌ د پێنج رۆژان دا بگه‌هینه‌ ئارمانجا خوه‌.