ل دهۆكێ رێنمایێن نوو ل دۆر ڤایرۆسێ كورۆنایێ بۆ كهسانێن دچنه حهج و عومرێ دهێته دان
پشتی بهلاڤبوونا ڤایروسێ كۆرونا ل سعودیێ و نێزیك بوونا بجهـ ئینانا چوونا حهج و عومرێ رێڤهبهریا گشتی یا ساخلهمیا دهوكێ ل رۆژا 2014/5/13 چهندین سمیناران بۆ وان كهسا رێكخستن یێن سهرهدانا وی وهلاتی دكهن ل دۆر چاوانیا خوپاراستن ژ ڤی ڤایروسێ ژبهركو ئێك ژ وان نهخوشیا دهێته ڤهگوهاستن.
د. نازك عبدولرهحیم، بهرپرسا رهوشهنبیریا ساخلهمیێ ل رێڤهبهریا كاروبارێن خو پاراستنێ ل دهوكێ دیاركر كو پلانا رێڤهبهریا گشتی یا ساخلهمیا پارێزگهها دهوكێ بو گێرانا چهندین سمیناران و ئاموژگاریا بو وان خهلكێ دچنه عومرێ ل سهر ڤایروسێ كورۆنا، و گوت: دهمهكێ درێژه ئهڤ ڤایروسه ل سعودیێ دیار بوی كو هژمارهكا مهزن ب ڤێ نهخوشیێ گیانێ خوه ژ دهست داینه، بهلێ خوشبهختانه ههتا نوكه چ حالهت ل كوردستانێ دیارنهبووینه، گهلهك ژ وان كهسێن وهلاتێن دهوروبهر تووشی ڤی ڤایروسی بووینه پشتی ڤهگریاینه وهلاتێ خو و هندهك حالهتێن مرنێ ژی پهیدابووینه.
د.نازكێ دیاركر كو دهمێ نیشانهك ل دهڤ كهسهكی دیار بیت دڤێت زوو سهرهدانا نێزیكترین بنگههێ ساخلهمیێ بكهن، دهمێ خهلكێ مه دچنه عومرێ گهلهك نێزیكی گیانهوهارا و جهێن گوڤان نهكهن، دیسان شیرێ نهكهلاندی نهڤهخون و ماستی نهخون و گرنگیهكا باش بدهن ب شووشتنا دهستێن خوه، ههروهسا ب كار ئینانا ماسكێن دهڤ و دفنا ژبهركو ئهڤه نهخوشیهكا ڤهگره داكو ئهو نهخوشی نهچیته كهسانێن دهوروبهرێن وان.
بهرپرسێ كومهلا حهج و عومرێ ل دهوكێ حهمزه حسێن دیار كر كو ههر بریارهك بهێته دان ل دۆر چوونا حهج و عومرێ ههمی كومپانێن حهج و عومرێ دێ پێگیریێ پێ كهن و دیسا دێ پێگیری ب ههمی رێنمایێن وان هێته كرن.