نوشدارێن ئه‌مریكی دێ 10 رۆژان نشته‌رگه‌ریان ل دهۆكێ ئه‌نجام ده‌ن
هاتیه بلاڤکرن روژا ئێک شه‌مبێ, 18 گولان 2014 - 2:25pm
شانده‌كێ نوشدارێن ئه‌مریكی گه‌هشته پارێزگه‌ها دهۆكێ و بڕیاره بۆ ده‌مێ ده‌ه رۆژان هژماروكا نشته‌رگه‌ریان ده‌گمه‌ن ل دهۆكێ ئه‌نجامبده‌ن.
د.غازی زێباری، سه‌رۆكێ شاندێ نوشدارێن ئه‌مریكی دیاركر شاندێ وان یێ پێك هاتیه ژ 18 نوشدارێن تایبه‌تمه‌ند د وارێن ( كۆما ده‌مارا، گوه و كه‌پ و گه‌وری، په‌نجه‌شێرێ، دل و هناڤا، نشته‌گه‌ریێن ب رێكێن دووربینێ، خوینێ و چاندنا ئه‌ندامێن له‌شی، چاڤا، پشكا ته‌نگاڤیا و چاڤدێریا چر) دگه‌ل ڤان ژی تیمه‌كێ ب رێیا ئه‌نترنێتێ چاره‌سه‌ریێ بۆ نه‌خوشا دكه‌ن ب رێكا هه‌ماهه‌نگی ل گه‌ل نوشدارێن ده‌رڤه‌یی وه‌لاتی و گۆت: ئه‌ڤ شانده دێ بۆ ده‌مێ 10 رۆژان ل هه‌ر دو نه‌خوشخانه‌یێن ئازادی یا فێركرنێ و ته‌نگاڤیا كاركه‌ن.
دیاركر ژی به‌ری نوكه هه‌ردو نه‌خوشخانه ئاگه‌هدار بووینه كو ئه‌ڤ شانده دێ سه‌ره‌دانا پارێزگه‌هێ كه‌ن له‌ورا چه‌ند نه‌خۆش ئاماده‌كرینه كو نشته‌رگه‌ری بۆ بهێنه ئه‌نجامدان دگه‌ل ڤێ چه‌ندێ ژی دێ چه‌ندین وانه‌یێن تایبه‌ت بۆ قوتابێن كولیژا نوشداری ل زانكۆیا دهۆكێ هێنه گوتن.
د.نزار عصمه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ دیار كر ئه‌ڤه بۆ ده‌مێن چه‌ندین جارایه شاندێن نوشدارێن ئه‌مریكی سه‌ره‌دانا كوردستانێ و پارێزگه‌ها دهوكێ دكه‌ن و هه‌ر جار ئه‌و زانستێن نوشداریێن نوو و سه‌رده‌مانه دگه‌ل خوه دئینن و گۆت: پارێزگه‌ها دهۆكێ پێدڤیه‌كا زۆر ب هاتنا ڤان شاندا هه‌یه، ژبه‌ركو زانستێن نوشداری به‌رده‌وام پێشڤه‌چوونێن نوو بخوڤه دبینن، پێدڤیه ئه‌مژی دگه‌ل وان زانستێن سه‌رده‌میانه ئاگه‌هدار بین و وان ته‌كنیك و زانستێن نوشداری ل هه‌رێما كوردستانێ و تایبه‌ت پارێزگه‌ها دهوكێ بده‌ینه كاری و هنده‌ك بنه‌مایێن راست و دروست ب ده‌ست خوڤه‌بینین ژبۆ پێشڤه‌برنا كه‌رتێ ساخله‌میێ و شاندێ نوشدارێن ئه‌مریكی دێ گه‌له‌ك خزمه‌تا نه‌خۆشێن پارێزگه‌ها دهۆكێ كه‌ت.
ئه‌ڤ مالپه‌ره فرێکه
