ساخلهمیا دهۆكێ و زانكویا دهۆك پروتوكولهك ل گهل نوشدارێن ئهمریكی - كوردی ئیمزا كر
ل سهنتهرێ رهوشهنبیری و جڤاكی ل زانكویا دهۆك پروتوكولهك پێنچ سالی دناڤبهرا رێڤهبهریا گشتی یا ساخلهمیا پارێزگهها دهۆكێ و زانكویا دهۆك دا دگهل گروپێ نوشدارێن ئهمریكی كوردی هاته ئیمزا كرن ژ بو بدهست ڤه ئینانا چهندێن بسپوریێن هویر و نوو یێن نوشداری یێن زانستی و سهردهم بو خزمهتا وهلاتیا.
ئهڤرۆ، بێوار شوكری:
د.مصلح دهۆكی، سهرۆكێ زانكۆیا دهۆكێ دیاركر زانكۆیا دهۆك ههردهم گرنگی دایه پهیوهندیێن خوه دگهل ههمی دهزگههێن جڤاكی، ئێك ژ پهیوهندیێن گرنگ ئیمزاكرنا پروتوكولهكێ یه كو ئهڤرۆ دناڤبهرا زانكویا دهۆك و رێڤهبهریا گشتی یا ساخلهمیا پارێزگهها دهۆكێ و گروپێ نوشدارێن ئهمریكی یێن كورد بو هاریكاریا مروڤایهتیێ و ئهكادیمی ژ بو بدهست ڤه ئینانا بسپوریێن هیور و نوو، و گوت: زانكۆیا دهۆك دێ یا رژدبیت ل سهر ئیمزاكرنا ڤان پروتوكولا، تایبهت د كهرتێ ساخلهمیێ دا ژبهر تایبهتمهندی و گرنگیا ڤی كهرتی بو خهلكێ مه ب گشتی، ئهم د وێ باوهریێ دانه گهلهك ژ نوشدارێن زانكویا دهۆك و رێڤهبهریا گشتی یا ساخلهمیا دهۆكێ دێ ژ ڤێ پروتوكولێ مفای وهرگرن.
پ.د.غازی زێباری سهروكێ گروپێ نوشدارێن ئهمریكی- كوردی دیاركر چهندین ساله ب هاریكاری و پشتهڤانیا بهردهوام یا حوكمهتا ههرێما كوردستانێ سهرهدانا كوردستانێ و دهۆكێ دكهین، ئێك ژ مهرهمێن مه ئهوه كو چ نهخوشێن مه پێدڤی دهرڤهی وهلاتی نهبن ، دیسامهرهما مه ژ ڤان سهرهدانا ئهوه ئهم چهند قوتابیێن خوه فێر بكهین د وارێن نوو یێن زانستی دا ب رێكا تێلێ مێدسن، و گۆت: سهرهدانێن مه دێ د بهردهوام بن و قوتابیێن مه ژی دێ سهرهدانا مهكهن و د ههمان دهمدا ئهم دشێن بهرێخو بدهینه كارێ وان یێ ڤێرێ كا چكریه برێكا ئهنترنێتێ.
د.نزار عسمهت، رێڤهبهرێ گشتیێ ساخلهمیا پارێزگهها دهۆكێ دیاركر كو كارهكێ زانستی ل نهخوشخانا ئازادی د هاته كرن ژ لایێ تیمێ نوشدارێن ئهمریكی و ههروهسا هاتنا پروفیسورهكێ ئهمریكی ژ زانكویا بهیروتێ داكو ئهوژی بشێت دگهلمهدا بهشدار بت و پشتی چهندین دانوستاندنا و دووفچونا ڤی بایهتی هاتیه كرن كا ب چ رێك دێ یێ كاریگهر بیت ئهم وهك رێڤهبهریا گشتی یا ساخلهمیا دهۆك و زانكویا دهۆك و گروپێ نوشدارێن ئهمریكیێ كورد ئهم گههشتنه وێ باوهریێ بشێن رێككهفتنهكا تێگههشتنێ ئێمزا بكهین، و گوت: د ڤێ رێككهفتنێ دا ئهم بیر ل وێ چهندێ بكهن ئهم ئالوگوریا وان سهربور شیانێن خو بكهینه ڤه، نوشدار و كارمهندێن خو و ههروهسا ب رێیا ئنترنێتێ و ئهم برێكا تهكنولوجیا تێلێ مێدسن بشێن هندهك خاندنێن بلند و هندهك تایبهتمهندیێن زور یێن هیر كو ئهم نهشێن نوكه ل كوردستانێ بكهن ئهگهر بهاریكاریا پروفیسورێن زیرهك نهبن ل وهلاتێن دی وهك ئهمریكا و ئهوروپا، سهرپهرشتیا ڤان قوتابیا بكهن وان بسپوریا بدهست خوڤه بینن، هیڤیدارم رێككهفتنهكا ب مفا و سهركهفتی بت ژ بو وان ههمی نوشدارێن دێ د ڤێ رێككهفتنێ دا بهشدار بن.
د.نزار عسمهت دیاركر ژی ئهف پروتوكوله بو پێنچ سالانه، دڤان پێنچ سالادا ئهم ههرسێ لایهن دێ كاركهن پێكڤه و ههر ئێك ژ مه ل گورهی بسپوریا خو دێ چهوا شێن ئێخنه بوارێ جێبهجێ كرنێ، گوت ژی: ئێكهم جار ئهم وهك ساخلهمی پێدڤی نه، دو لایهن دێ هاریكاریا مه كن، زانكۆیا دهۆك دێ بیته لایهنێ سهرهكی و ڤان بسپوریا ڤهكهت ب پشتهڤانیا زانكویێن ئهمریكی، ب سهرپهرشتیا پ.د.غازی زێباری، ئهف چهنده دێ هێته جێبهجێكرن، نوشدارێن مه وان بسپوریا بدهست بێخن یێن ل دهف مهنه بشێن خزمهتا خهلكێ مه بكهن ل ڤێرێ، پروفیسورێن ئهمریكی وهك یێن زانكویا دهۆك سهرهدهری دگهلدا هێته كرن بو سهرپهرشتی كرنا ڤان قوتابیا.