ساخله‌میا دهۆكێ‌ هه‌لویستێ‌ روودانێن رۆژێن بۆری رادگه‌هینیت

رێڤه‌به‌ریا گشتی یا ساخله‌میا پارێزگه‌ها دهۆكێ‌، ژووره‌ك بۆ دووڤچۆنا رۆژانه‌ یا پێدڤیێن رۆژانێن شه‌ری، ب سه‌رۆكاتیا د.نزار عصمه‌ت، رێڤه‌به‌رێ‌ گشتیێ‌ ساخله‌میا پارێزگه‌ها دهۆكێ‌ پێكئینا كو به‌رده‌وام دكاری دا بیت بۆ دابینكرن و دووڤچۆنا ره‌وشا ساخله‌میێ‌ د رۆژانێن بهێت دا.
د كۆمبوونێ‌ دا بڕیار هاته‌ دان هه‌موو نه‌خۆشخانێن گشتی ل دهۆك و زاخۆ و ئاكرێ‌ و شێخان د ئاماده‌باشیێ‌ دابن و 24 ده‌مژمێران پێشوازیێ‌ ل بریندار و نه‌ساخان بكه‌ن، هه‌روه‌سا چه‌ند تیمێن گه‌رۆك ل گه‌ل خزمه‌تا 122 به‌رده‌وام د كاری دابن ل سه‌ر سنورێن پارێزگه‌هێ‌ و هه‌موو پێدڤی ژ ده‌رمان و ڤێراگه‌هشتنێن ده‌ستپێكێ‌ بهێنه‌ دابینكرن و ژبه‌ركو هژمارا نه‌خۆشان ل ده‌زگه‌هێن ساخله‌میێ‌ دێ‌ پتر لێ‌ هێت، ب تایبه‌ت نه‌خۆشێن دومدرێژ و ته‌لاسیمیا و حاله‌تێن خوونبه‌ربوونێ‌، له‌ورا پێدڤی ب ئه‌نجامدانا هه‌وێن به‌خشینا هه‌یه‌ داكو ل ده‌مێن پێدڤی بۆ نه‌خۆشان بهێته‌ به‌خشین. هه‌روه‌سا بڕیار هاته‌ دان كو سه‌نته‌ر و پشكێن گولچیسك شووشتنێ‌ و به‌نكا خوینێ‌ و تاقیگه‌هێن ته‌نگاڤیان، رۆژانه‌ 24 ده‌مژمێران ڤه‌كری بمینن و خزمه‌تا نه‌خۆشێن پێدڤی بكه‌ن.
ل دۆر روودانێن چه‌ند رۆژێن ده‌ربازبووی، حه‌مزه‌ ره‌زیكی، رێڤه‌به‌رێ‌ راگه‌هاندنا ساخله‌میا پارێزگه‌ها دهۆكێ‌ دیاركر كو هه‌تا نوكه‌ 10 شه‌هید گه‌هشتینه‌ ده‌زگه‌هێن ساخله‌میێ‌ ل پارێزگه‌ها دهۆكێ‌ كو (3) ژوان كورد و 3 ژ له‌شكرێ‌ عیراقێ‌ نه‌ ل گه‌ل دو زارۆك و دو ژنان ژی.
هه‌روه‌سا دیاركر كو 58 بریندار هاتینه‌ ره‌وانه‌كرن بۆ نه‌خۆشخانا ته‌نگاڤیان ل دهۆكێ‌ و 180 روودان ژی ب هاریكاریا تیمێن 122 یێن ڤێراگه‌هشتنێن ده‌ستپێكێ‌ ل جهێ‌ روودانێ‌ هاتینه‌ چاره‌سه‌ركرن و گۆتژی: 15 ژنێ، دوگیان ب ترۆمبێلێن ڤێراگه‌هشتنێ‌ گه‌هاندینه‌ نه‌خۆشخانا ژنان و زارۆبوونێ‌ ل پارێزگه‌ها دهۆكێ‌.