خولهكا ساخلهمیا دهروونی ب دووماهی هات
ژ پێخهمهت پێشڤهبرنا رهوشا ساخلهمیا دهروونی ل پارێزگهها دهۆكێ و كهمپێن ئاوارهیێن رۆژئاڤا، رێڤهبهریا گشتی یا ساخلهمیا پارێزگهها دهۆكێ ب ههڤكاری ل گهل رێكخراوا نوشدارێن بێ سنور MSF بۆ دهمێ سێ ههیڤان خولهكا ساخلهمیا دهروونی ڤهكر و ئهڤرۆ 12/6/2014 ب دووماهی ئینا.
د.پهرجان هاشم، رێكخهرێ ساخلهمیا دهروونی ل پارێزگهها دهۆكێ دیاركر كو خولا ناڤبری ژ ههیڤا ئادارا ئهڤ ساله دهستپێكربوو و 15 چارهسهركارێن دهروونی ل دهۆكێ و رۆژئاڤا پشكداری خولێ ببوون كو حوفتیانه ههشت دهمژمێران وانهیێن تیوری و پراكتیكی دهاتنه پێشكێشكرن و گۆت: ئهڤ خوله ب پشتهڤانیا رێكخراوا نوشدارێن بێ سنور هاته برێڤهبرن.
هاله كو ژوهلاتێ لبنانێ یه و بهرپرسا ساخلهمیا دهروونی یه ل رێكخراوا نوشدارێن بێ سنور و وهكو ماموستایا خولێ دیاركر ، كو ئارمانج ژ خولێ ئهوبوو راهێنهران پهیدابكهن كو بشێن پشتهڤانیا دهروونی و جڤاكی پهیدابكهن و گۆت: گهلهك بابهت هاتنه پێشكێشكرن ژوانژی ترۆما و توندوتیژیێن سێكسی و پێكڤهژیانا خێزانێ ل دهمێن قهیران و كارهساتان و بابهت ب شێوازێن تیوری و پراكتیكی هاتنه پێشكێشكرن.
د.نزار عصمهت، رێڤهبهرێ گشتیێ ساخلهمیا پارێزگهها دهۆكێ دیاركر كو پهیداكرنا زیرهكی و شارهزایێ دوارێن ساخلهمیا دهروونی دا ئێك ژ ئارمانجێن رێڤهبهریا گشتی یا ساخلهمیا پارێزگهها دهۆكێ یه و گۆت: پشكداریكرنا نیڤهك ژ چارهسهركارێن دهۆكێ ل گهل چارهسهركارێن دهروونی ل رۆژئاڤا پێنگاڤهكا گرنگ بوویه كو بشێن پشتهڤانیا دهروونی و جڤاكی بۆ ئاكنجیێن كهمپا دابین بكهن.
ل دووماهیا خولێ باوهرنامه ل سهر پشكدارێن خولێ هاتنه بهلاڤكرن.