500 نه‌خوشان پێدڤى پێ هه‌یه
هاتیه بلاڤکرن روژا جارشه‌مبێ, 25 خزیران 2014 - 9:01am
مەتین جمیل
بۆ جارا ئێكێ ل دهۆكێ قه‌وقه‌عا گوهى بۆ یازده نه‌خۆرشان هاته چاندن
بۆ جارا ئێكێ و ب پشته‌ڤانیا راسته‌وخو یا سه‌رۆكێ حوكمه‌تا هه‌رێما كوردستانێ، یازده قه‌وقه‌عێن گوهى ل دهۆكێ هاتنه چاندن و بڕیاره بۆ قۆناغا دوێ ژى 70 زارۆیێن دى مفاى ژێ وه‌ربگرن، تایبه‌تمه‌نده‌كێ نه‌خۆشیێن گه‌وریێ و كه‌پ و گوهى دیاردكه‌ت كو ل دهۆكێ دۆرێن 500 نه‌خۆشان پێدڤى ب دانانا قه‌وقه‌عێ هه‌یه و هه‌تا نوكه ناڤێن 200 نه‌خۆشان هاتینه تۆماركرن، ژبه‌ر گرانیا بهایێ ئه‌نجامدانا ڤان نشته‌رگه‌ریان حوكمه‌تا هه‌رێمێ پشته‌ڤانیێ ل نه‌خۆشان دكه‌ت و ب تایبه‌ت نه‌خۆشێن ل ژێر دوسالیێ كو پترى یێن دى مفاى ژێ دبینن و هاى ژ ده‌نگان دبیت.
د. زه‌یتو خوشابا، تایبه‌تمه‌ندێ نه‌خوشیێن گه‌ورى و كه‌پ و گوهى دیاركر كو قه‌وقع ئه‌ندامه‌كێ ناڤ گوهى یه كارێ وى پێشوازیا ده‌نگانه و ڤه‌دگوهزیت بو مێشكى و گۆت: ئه‌ڤ قه‌وقعه هنده‌ك شانه هه‌نه كارێ وان ڤه‌گوهاستنا شه‌پولین كاره‌بێ یه بو مێشكى داكو نه‌خوش گوه ل كه‌سێ به‌رامبه‌ر ببیت، و هه‌تا نوكه یازده نشته‌گه‌رى بو زارویێن كێمتر ژ دوسالیێ هاتینه‌كرن و ئه‌ڤه گه‌را ئێكێ یه و ب سه‌ركه‌فتیانه هاته ئه‌نجامدان.
دیاركر ژى بۆ گه‌را دوێ نێزێكى 70 نه‌خوشان ناڤێن خوه توماركرینه بو نشته‌رگه‌ریێ، ئه‌ڤ نشته‌رگه‌یه پتر بو وان زارۆیان باشه یێن ژیێ وان كێمتر ژ دو سالیێ به‌رى فێرى زمانى ببن، چونكو ژیێ پێهه‌لتر زه‌حمه‌ت مفاى ژىّ ببینن، هه‌كه مفاى ژى ژێ بینن دێ گه‌له‌كا ب زه‌حمه‌ت بیت، چونكو فێركرنا زمانى بۆ ژیێ وان ب زه‌حمه‌تتر دكه‌ڤیت.
ل دورپشكنینا د. زه‌یتو خوشابا دیاركر كو ل ده‌ستپێكێ ئه‌و به‌رێخودانێ ل نه‌خوشى دكه‌ن كا دێ شیانێن وه‌رگرتنا به‌نجێ هه‌بن یان نه و دیسان كا چ نه‌خوشێن دومدرێژ لێ هه‌نه، پاشى هنده‌ك پشكنینێن تایبه‌ت ب ڤێ نشته‌رگه‌یێ هه‌نه ئه‌و ژى گرتنا تیشكا C,T scan و ره‌نینا مه‌گناتیسى، داكو بزانین قه‌وقع هه‌یه یان نه، چونكو هنده‌ك زاۆر هه‌نه د زكماك دا د كه‌رولالن و پێدڤى ناكه‌ت بو وان نشته‌رگه‌ریان بكه‌ین، یادووێ ئه‌و ده‌مارێ ژ قه‌وقعى بو دچیته مێشكى هه‌كه نه‌بیت نشته‌رگه‌رى بو ناهێته‌كرن.
تایبه‌تمه‌ندێ نه‌خۆشیێن گه‌ورى و كه‌پ و گوهى دیاركر ژى كو نشته‌رگه‌ریێن هاتینه ئه‌نجامدان نه‌خوش دێ هه‌تا هه‌تایێ مفاى ژێ بینن و گۆتژى: پتریا نه‌خۆشان خه‌لكێ دهۆكێ بوون و ب تنێ ئێك خه‌لكێ رۆژئاڤایێ كوردستانێ بوو، و هه‌تا نوكه دۆرێن 200 نه‌خۆشان ناڤێن خوه تورماركرینه و نێزیكى 500 كه‌سان ل دهوكێ هه‌نه كو پێدڤى ب دانانا قه‌وقه‌عێ ببن، ئه‌ڤ نشته‌رگه‌رى یه جارا ئێكێ یه ل دهۆكێ دهێته‌كرن، چونكو بهایێ ڤێ نشته‌رگه‌ریێ دگرانن و كرینا قه‌وقه‌عێ ب تنێ نێزیكى 25 ملیون دینارانه ژبلى كارى، له‌ورا ب پشته‌ڤانیا نڤسینگه‌ها سه‌رۆكێ حوكمه‌تا هه‌رێما كوردستانێ هاتینه ئه‌نجامدان، بۆ هه‌رسێ پارێزگه‌هێن هه‌رێمێ كو به‌هرا هه‌ولێر و سلێمانیێ هه‌رئێك 100 قه‌وقعن، به‌لێ یا دهوكێ 70 قه‌وقع په‌یداكرینه.
د. زه‌یتو خوشابا دیاركر ژى كو پێدڤیه دایك و باب چاڤدێریا زارۆیێن خوه بكه‌ن، چونكو هه‌ستیێ قه‌رقودێ سه‌رى دهێته قوركرن و قه‌وقع تێدا دهێته چاندن، هه‌كه هات و لێدانه‌ك ب سه‌رێ زارۆى كه‌ت دێ كارتێكرن لێ بیت، چونكو دبیت بگه‌هیت مێشكێ وى، ژبه‌ركو وه‌كى وایره‌كێ یه دگه‌هیته مێشكى و گۆتژى: قه‌وقه‌ع گرێداى ده‌ماره‌كێ یه كو ده‌نگى دگه‌هینیته مێشكى، هه‌ر لێدانه‌كا بچووك هه‌بیت دێ ئه‌ڤ ئامیره ژ كاركه‌ڤیت.
دیاركر ژى پشتى هه‌یڤه‌كێ ژ نشته‌رگه‌ریێ دێ زارۆیان فێرى ئاخفتنێ كه‌ن، چونكو ئه‌ڤه رامانا وێ چه‌ندێ ناده‌ت هه‌ر زارۆیه‌كێ قه‌وقه‌ع چاند دێ ئێسكه‌ر فێرى ئاخفتنێ بیت، له‌ورا ئه‌ڤه كار پێدڤێت دبیت هه‌تا شه‌ش هه‌یڤان یان دوسالان ژنوو زارۆ فێرى ئاخفتنێ ببیت.
ل دووماهیێ د.زه‌یتو دیاركر ژى كو پێدڤیه خه‌لك بێهنا خوه فره‌ه بكه‌ن، ژبه‌ركو گه‌له‌ك كه‌س هه‌نه ئیلحاحێ دكه‌ن، كو دڤێت بزانن زارۆیین وان یێن چار سالى دێ مفاى ژێ بینن یان نه، ل ده‌ستپێكێ ئه‌م گرنگیێ دده‌ینه زارۆیێن ژ دو سالان كێمتر كو دزانین دێ مفایه‌كێ باش ژێ بینن و هه‌ر زارۆیه‌كێ بزانین مفا بۆ هه‌یه دێ ناڤێ وى تۆماركه‌ین و بۆ قۆناغێن بهێت دێ پشكنینا وان هێته كرن.
ئه‌ڤ مالپه‌ره فرێکه
