شهڤانه ل دهۆكێ خوین دهێته بهخشین
وهك پشتهڤانى بۆ كهسانێن نهخۆش و بریندار و لێقهومایێن روودانان، رێڤهبهریا خزمهتێن ڤهگوهاستنا خوینێ سهر ب رێڤهبهریا گشتى یا ساخلهمیا پارێزگهها دهۆكێ دهست ب دانانا كهمپینهكا بهخشینا خوینێ كریه و رۆژنامهڤانێن دهۆكێ پتریا بوتلێن خوینێ ههتا نوكه پێشكێشكرینه.
ئاراز مزویرى، ئێك ژ رێكخهرێن كهمپینى دیاركر كو ژبهركو مهها رهمهزانێ یه و پتریا خهلكى رۆژیگرن و ژبهر ههر ئهگهرهكێ ههبیت ب رۆژ هژمارهكا كێم یا خهلكى سهرهدانا بهنكا خوینێ ددهن بۆ بهخشینا خوینێ، لهورا وان ب باشتر زانى شهڤانه دهست ب ههوێن بهخشینا خوینێ بهێته كرن و گۆت: ل دهستپێكا ههیڤا رهمهزانێ وهره ئهو شیاینه پتر 200 بتلێن خوینێ كۆمڤهكهن.
حهمزه رهزیكى، بهرپرسێ راگههاندنا رێڤهبهریا گشتى یا ساخلهمیا پارێزگهها دهۆكێ دیاركر كو د ههوا خوینبهخشینێ دا ئهوا ژ بۆ رۆژنامهڤانان هاتیه رێكخستن مهزنترین هژمارا بتلێن خوینێ د كهمپینێ دا خرڤهبووینه كو پترى 50 بتلان بوون و گۆت: د ڤێ كهمپینێ دا رۆژنامهڤانان دوور ژ بابهتێن سیاسى پشكدارى كر و سهرهراى پهیاما خوه یا مرۆڤایهتى ڤییا خزمهتهكا مرۆڤایهتى ژى پێشكێش بكهن.
رهزیكى دیاركر كو شهڤانه ل دهمژمێر 9-12 شهڤ ئهڤ كهمپینه ل تهنشت بهنكا ئهمیرالد دێ یا بهردهوام بیت و خواست كو ههموو تهخ و تویژێن جڤاكى قهستا كهمپینێ بكهن بۆ هاریكاریا نهخۆشان.