ساخلەمیا پارێزگەها دهوکێ ئامارێن رەوشا ساخلەمیا ئاوارێن شنگالێ راگەهاندن
هاتیه بلاڤکرن روژا جارشه‌مبێ, 13 ته‌باخ 2014 - 5:01pm
ژنێن په‌نابه‌ر 361 زارۆ ل دهۆكێ په‌یدابووینه
د.نزار عسمه‌ت، رێڤه‌به‌رێ گشتى ساخله‌میا پاێزگه‌ها دهوكێ د كونگره‌كێ رۆژنامه‌ڤانى دا دیار كر: هه‌ر ژ ده‌ستپێكا په‌دیا بوونا ڤێ قه‌یرانێ دێ هنده‌ك ئاماران ل دوور ئاواره و ده‌ربه‌ده‌رێن چیایێ شنگالێ راگه‌هینین وه‌كى پێدڤى ل ده‌ست پێكێ مه بۆ ئاماده‌كارى بۆ ڤێ قه‌یرانێ كر بوو وه‌ك رێڤه‌به‌ریا گشتى یا ساخله‌میا دهوكێ هه‌مى نه‌خوشخانه و بنگه‌هێن ساخله‌میێ كه‌فتینه دكارى دا بۆ ده‌مێ 24 ده‌مژمێران و چه‌ندین تیم هاتینه پێك ئینان دا ك سه‌ره‌دانا وان په‌نابه‌ران بكه‌ن و چاره‌سه‌ریا وان بكه‌ن.
سه‌باره‌ت ئاماران دیار كر: د ماوێ 9 هه‌تا 11/8 ڤێ هه‌یڤێ سه‌ره‌دانا نه‌خوشا بۆ بنگه‌هێن سێمێل و شاریا و خانكێ و ده‌وروبه‌رێن وێ ده‌هـ جاركى زێده‌بوویه ئه‌ڤه ژى بارگرانیه‌كا مه‌زن ئێخستیه سه‌ر ڤان بنگه‌هان ئه‌ڤه ژى وێ چه‌ندێ دیار دكه‌ت كو رێژا نه‌خوشیا دناڤا وان په‌نابه‌ران دا زۆر زێده‌بوویه.
دیار كر ژى: د چه‌ند رۆژێن بورى دا دوو هزار 334 نه‌خوش سه‌ره‌دانا ڤان نه‌خوشخانا كرینه ، 714 نه‌خوش ل زاخۆ ، 25 ل ئاكرێ ، 72 ئامێدیێ ، 13 نه‌خوشخانا ئازادى دهوك ، زاروك بوونێ 204 ، نه‌خوشخانا هیڤى 224 و سه‌رجه‌مێ گشتى نه‌خوشێن هاتینه نڤاندن دبیته هزار و 361 نه‌خوش هاتینه نڤاندن و نیشته‌گه‌رى 96 نیشته‌گه‌رى و زاروك بوون 364 ژدایك بووینه.
575 تیمێن ڤاكسیندانێ هاتینه دروست كرن بۆ زێده‌تر ژ 150 هزار زاروك فاكسین بو هاتینه دانان ژ وانا ژى 32 هزار زاروكێن په‌نابه‌ر ڤاكسین وه‌رگرتیه ژ وانا شه‌ش هزار زاروكێن كوردێن رۆژئاڤا بووینه ل كه‌مپا دومیز.
دیار كر: خزمه‌تێن هه‌وار هاتنا بله‌ز حه‌فت هزار و 944 كه‌س چاره‌سه‌ر كرینه، ل گوره‌یى دوماهیك ئامار هه‌تا نوكه پێنج كه‌سێن په‌نابه‌ر گیانێ خو ژده‌ست دایه.
دیار كر ژى: وه‌ك پێتڤى ئه‌م نه‌شیاینه خزمه‌تا وان په‌نابه‌ران بكه‌ین ژ وانا ژى كێماسیا ترومبێلێن هه‌وار هاتنێ و ژمارا كارمه‌ندێن ساخله‌میێ ژ نوژدار و په‌رستارا و به‌ربه‌لاڤ بوونه‌كا به‌ره‌لا ژلایێ وان په‌نابه‌ران ڤه ده‌مێ ده‌رمان ژى بو وان دهێنه هنارتن و یان تیمێن مه سه‌ردانا وان دكه‌ن ل جهێن خو نامینن ئه‌ڤه ژى بووینه ئاریشه بۆ تیمێن ساخله‌میێ كو نه‌شێن ب دروستى كارێ خو راببن.
گوت ژى: ژبۆ باشتر كرنا ڤێ ره‌وشێ ئه‌م پێتڤى ب زێده‌كرنا ترومبێلێن ئامبولانس هه‌یه ، دامه‌زراندنا بله‌ز یا نوشدار و په‌ره‌ستارێن نها ده‌رچووین ، دانانا كوژمه‌كێ پاره‌یى به‌رده‌ست بو هه‌مى تیما وه‌ك پشته‌ڤانى و پێتڤێن وان ، دابینكرنا ده‌رمانێن پێتڤى ژلایێ هه‌ردوو وه‌زارتێن ساخله‌میا حكومه‌تا ئیراقێ و حكومه‌تا هه‌رێما كوردستانێ دا كو بشێن وه‌ك پێتڤى خزمه‌تا ڤان په‌نابه‌ران بهێته كرن و نه‌بیته ئه‌گه‌رێ به‌ربه‌لاڤ بوونا نه‌خوشیێ د ناڤا وان په‌نابه‌ران دا.
ئاشكرا كر : په‌یوه‌ندیێن مه دگه‌ل حكومه‌تا ئیراقێ هه‌نه و مه لیسته‌كا ئاماده‌كریه ژ هه‌مى پێتڤێن مه دا كو ب زوترین ده‌م بگه‌هنه مه دهێته ره‌وانه‌كرن بۆ به‌غدا ئه‌گه‌ر هاریكارێن وان زوو نه‌گه‌هن دێ قه‌یرانه‌ك دروست بیت دگه‌ل ڤێ چه‌ندێ ژى وه‌زاره‌تا ساخله‌میا هه‌رێمێ پشته‌ڤان و هاریكاریا ساخله‌میا دهوكێ كریه ئه‌م هیڤیدارین هه‌مى لایه‌نێن په‌یوه‌ندیدار هاریكاریا كه‌رتێ ساخله‌میێ بكه‌ن.
رێڤه‌به‌رێ گشتى ساخله‌میێ دیار كر ژى: هه‌تا نها چ نیشانێن نه‌خوشێن مه‌ترسى نین به‌لێ نه‌خوشێن زك چوون و هنده‌ك نه‌خوشێن پیستى دزێده‌بوونێ دانه ئه‌ڤه ژى ئه‌گه‌ر زكچوون گه‌له‌ك زێده بیت چێ دبیت نه‌خوشیا كولێرا و هنده‌ك نه‌خوشێن دى په‌یدا ببن له‌ورا ئه‌م حاله‌تێ مه‌ترسی رادگه‌هینن دا كو هه‌مى لایه‌ن په‌یوه‌ندى دار ئاگه‌هدار بن له‌زێ بكه‌ن بۆ دانانا كه‌مپێن تایبه‌ت بۆ په‌نابه‌ران دگه‌ل هه‌مى پێتڤێن ژیانێ ژ ده‌ست ئاڤ و حمام و ئاڤا ڤه‌خارنێ یا پاقژ بۆ بهێته دابین كرن.
ئه‌ڤ مالپه‌ره فرێکه
