رۆژا جیهانى یا دهشتشووشتنێ هاته ساخكرن
ل قوتابخانا عهفرین ل كهمپا دومیز و ب سهرپهرشتیا رێڤهبهرێ ناحیا فهیدیێ ( قادر یاسین)، رێ و رهسمێن رۆژا جیهانیا دهستشووشتنێ هاتنه گێران.
د. خهلیل ئیسماعیل، نوونهرێ رێڤهبهریا گشتى یا ساخلهمیا پارێزگهها دهۆ كێ دیاركر كو ل ڤێ رۆژێ پێدڤیه خهلك بهێته ئاگههداركرن و ئارمانجا سهرهكى ژێ ئهوه خهلك ب گشتى مفایێن دهست شووشتنێ د خوپاراستنێ ژ نهخوشیان دا بزانن كو دهستشووشتن ژى رێیا سهرهكى یه د ڤى وارى دا و گۆت: چونكو ههموو كارێن رۆژانه ئهنجام ددهین ب رێیا دهستینه و دڤێت دهست پاقژ بهێنه راگرتن.
عهبدولا حهسهن، رێڤهبهرێ پهروهردا قهزا سێمێلێ، دیاركر كو پاقژى خالهكا گرنگه د پروسێسا پهروهردێ دا و دهما قوتابى ل دهستپێكێ دهێته قوتابخانێ، ماموستا فێرى دهست شووشتنێ دكهت، و پێدڤیه ژینگهها قوتابى ژ مال ههتا دگههیته قوتابخانێ پاقژ بهێته راگرتن.
ئیدریس مهجید، رێڤهبهرێ ژیگهها دهۆكێ دیاركر كو ژینگهه و ساخلهمى دو خالێن پێكڤه دگرێداینه، ژینگهههكا پاقژ رامانا وێ ساخلهمیهكا باش ههیه و ههكه ته گوت ساخلهمیهكا باش رامانا وێ ژینگهههكا پاقژه، لهرا پێدڤیه ژینگهه و ساخلهمى كارا پێكڤه بكهن و پێدڤیه گرنگیهكا تایبهت ب روژا جیهانیا دهست شووشتنێ بهێته دان و ب تایبهت ل قوتابخانا، ژبهركو ئهو پاشهروژا ڤى مللهتینه، ههكه ئهڤ رهوشته دناڤ زارۆیان دا هاته پهیرهوكرن دێ بیته فاكتهر بۆ جڤاكهكێ پاقژ و دێ پووتهى ب ژینگههێ دهت ئهوا مروڤ ژیانا خو تێدا دبورینیت.
دیاركر ژى كو سالانه سێ ملیون و پێنجسهد هزار زارۆ ل جیهانێ ژ ئهگهرێ نهخۆشیا گیانێ خوه ژدهست ددهن كو 40% ژوان ژئهگهرێ پیساتیێ نه.
حهمزه رهزیكى، بهرپرسێ راگههاندنا ساخلهمیا دهۆكێ دیاركر كو ب ههلكهفتا رۆژا جیهانى یا دهستشووشتنێ دێ هژمارهكا چالاكیان ل ئاكرێ و بهردهرهش ژى هێنه ئهنجامدان و گۆت: مهرهما مه ژ دهستنیشانكرنا كهمپێن ئاوهران ئهوه پتر هشیارى و رهوشهنبیریا ساخلهمیێ لێ بهێته بهلاڤكرن.