497 ژن ل دهۆكێ تووشى په‌نجه‌شێرا مه‌مكان بووینه
هاتیه بلاڤکرن روژا پێنج شه‌مبێ, 30 چریا ئيكى 2014 - 12:00am
سالانه هه‌یڤا چریا ئێكێ چالاكیێن جورا و جور دهێنه ئه‌نجامدان ژ بۆ هشیاركرنا ژنان ل دۆر رێكێن ده‌ستنیشانكرن و چاره‌سه‌ریا په‌نجه‌شێرا مه‌مكان، ل دهۆكێ ژى پشتى ب دووماهى هاتنا هژماره‌كا چالاكیان، 29/10/2014 ئامارێن نه‌خۆشیێ و رێكێن خوپاراستنێ ژ نه‌خۆشیێ و چاوانیا به‌رهنگاریا وێ هاتنه گه‌نگه‌شه‌كرن.
ل ده‌ستپێكا رێ و ره‌سمان، د.ئه‌فراسیاب موسا، رێڤه‌به‌رێ نه‌خۆشخانا ئازادى یا فێركرنێ په‌یڤا رێڤه‌به‌ریا گشتى یا ساخله‌میا پارێزگه‌ها دهۆكێ پێشكێشكر و دیاركر كو بزاڤێن وان بۆ به‌رهنگاربوونا ڤێ نه‌خۆشیێ د به‌رده‌وامن، له‌ورا ژى كلینیكه‌كا تایبه‌ت ل نه‌خۆشخانێ هه‌یه و هه‌ر تشتێ پێدڤى بۆ ژنێن تووشى نه‌خۆشیێ دوارێن چاره‌سه‌ریێ دا دهێته پێشكێشكرن.
د. زه‌كى عه‌لى، به‌رپرسێ پشكا نه‌خوشیێن په‌نجه‌شێرێ دیاركر كو ئه‌و نه‌خۆشێن سه‌ره‌دانا كلینیكا نه‌خوشخانا ئازادى یا تایبه‌ت دكه‌ن هه‌موو چاره‌سه‌رێن پێدڤى بو دهێنه كرن و گۆت: ژوان ده‌ستنیشانكرنا بله‌ز و ئه‌نجامدانا نشته‌رگه‌ریێ و پشكنینا دلنیابوونێ ل تاقیگه‌هێ، هه‌روه‌سا به‌رده‌وامیدان ب چاره‌سه‌ریا وان ب رێیێن تیشكێ، كێمیاوى و رێكا ده‌رمانێن پێشكه‌ڤتى.
به‌رپرسێ پشكا نه‌خوشیێن په‌نجه‌شێرێ، دیاركر ژى ئامارێن ل به‌ر ده‌ست وه‌سا خویادكه‌ن كو نوكه 497 نه‌خۆش ل دهۆكێ هه‌نه و نه‌ه نه‌خۆشان ل ئه‌ڤ ساله گیانێ خوه ژئه‌گه‌رێ نه‌خۆشیێ ژ ده‌ستدایه، ره‌نگه گه‌له‌ك نه‌خۆشان گیانێ خوه ژده‌ستدابیت به‌لێ خه‌لكێ ده‌ڤه‌رێن ده‌رڤه‌ى ئیدارا هه‌رێمێ بن و مه پێ نه‌زانیبیت، و گۆت: رێژا توشبوونێ ل وه‌لاتێ مه‌ژى وه‌ك هه‌موو جیهانێ هه‌ر ژهه‌شت ژنان ئێك تووشى دبیتێ، به‌لێ ژ 100 زه‌لامان ژى دو كه‌س دبنه قوربانێن ڤێ نه‌خوشیێ و ئه‌ڤ نه‌خوشیه نه ب تنێ بو ژنانه به‌لكى زه‌لام ژى تووش دبنێ.
د. سیروان محه‌مه‌د ئه‌سوه‌د، رێڤه‌رێ كاروبارێن خوپاراستنا ساخله‌میێ دیاكر كو ژبو به‌رهنگاربوونا ڤێ نه‌خوشیێ ل سه‌رانسه‌رى جیهانێ پێدڤیه خه‌لك بزانن بۆ خوپاراستنێ ژڤێ نه‌خوشیێ چه‌ندین رێك هه‌نه بو ده‌ستنیشانكرنا وێ، وگۆت: پێدڤیه هه‌ر ژنه‌ك ده‌ما ژیێ وێ بگه‌هیته 40 سالى ب زووترین ده‌م پشكنینا خوه بكه‌ت یان سه‌ره‌دانا كلینیكا تایبه‌ت یا ڤێ نه‌خوشیێ بكه‌ت ل نه‌خوشخانا ئازادى، داكو دلنیا بیت كا ئه‌ڤ نه‌خوشیه لێ نینه و هه‌كه هه‌بیت ژى چاره‌سه‌ریا زوو وه‌ربگریت.
ئه‌ڤ مالپه‌ره فرێکه
