11260 كه‌س ل دهۆكێ توشى نه‌خوشیا شه‌كرى بوینه
هاتیه بلاڤکرن روژا دوو شه‌مبێ, 17 چریا دووى 2014 - 2:04pm
دوهى روژا دوشه‌مبى ب هه‌لكه‌فتا روژا جیهانى یا نه‌خوشیا شه‌كرێ ئه‌وا دكه‌ڤیته 14/11 ل سه‌رانسه‌رێ جیهانێ چالاكى دهێنه‌كرن له‌ورا ب ڤێ هه‌لكه‌فتێ سه‌نته‌رێ دهۆك یێ نه‌خوشیێن شه‌كرێ ئه‌ڤ روژه ساخكر ب چه‌ندین چالاكیا، رێڤه‌به‌رێ سونته‌رێ دیارك ركو ل جیهانێ هه‌مكى شه‌ف نه‌خوشیه روژ بو روژێ د زێده‌بونێ دایه، و 11260 نه‌خوشێن شه‌كرێ ل سه‌نته‌رێ دهۆك یێ نه‌خوشیێن شه‌كرێ توماركرینه.
د. ادریس حاجى ئه‌حمه‌د رێڤه‌به‌رێ سونته‌رێ نه‌خوشیا شه‌كرێ ل دهۆكێ دیاركر وه‌كو پێناسه ده‌مێ رێژا شه‌كرێ دناف لىشێ كه‌سه‌كیدا زێده دبت دبێژنێ نه‌خوشیا شه‌كرێ ڤى كه‌سى یا هه‌ى، و ژ نه‌خوشیێن دوم درێژه و نه‌خوشیه‌كه یا به‌ربه‌لاڤه ل هه‌مى جیهانێ و روژ بو روژێ به‌ره‌ف زێده‌بونێ یه، و گوت: ل سه‌رانسه‌رى ئیراقى نێزكى ژ 10% خه‌لك توشى نه‌خوشیا شه‌كرێ بویه، لێ ل پارێزگه‌ها دهۆكێ هه‌ر ملیون كه‌سا 100 هزرا كه‌س توشى بوینه، گوت ژى: تانوكه ئامارێن ل به‌رده‌ستێ مه ل سه‌نته‌رێ نه‌خوشیا شه‌كرێ ل دهۆكێ 11260 نه‌خوشێن شه‌كرێ توماركرینه و پتریا وان ژنن.
رێڤه‌به‌رێ سه‌نته‌رێ نه‌خوشیا شه‌كرێ دیار كر ژى ئه‌گه‌رێن سه‌ره‌كى یێن نه‌خوشیا شه‌كرێ تانوكه نه‌هاتینه ده‌ست نیشان كرن بتنێ جورێ ئێكێ ئه‌وێ ل ده‌ف زارۆیا په‌یدا دبت هنده‌ك شاره‌زا دبێژن دبیت ژ هه‌ودانه‌كا ڤایروسى بت یان ل ده‌مێ زارۆ یێ قه‌له‌وبویه یان شیرى چێلا خاربت ئه‌ڤه هه‌مى جهێ گومانێ نه، جورێ دوێ یێ نه‌خوشیا شه‌كرێ ئه‌م دبێژن ئه‌گه‌رێ سه‌ره‌كى قه‌له‌ویه ژبه‌ركو قه‌له‌وى ل سه‌ر ئاستێ جیهانێ یا به‌ربه‌لاڤه، و هنده‌ك ئه‌گه‌رێن دى هه‌نه ئه‌گه‌ر ده‌ى باب یان ئه‌ندامه‌كێ خێزانى ئه‌ف نه‌خوشیه هه‌بت ، هنده‌ك جورێن نه‌خوشیان ژى دبنه ئه‌گه‌رێ په‌یدا بونا ڤێ نه‌خوشیێ ژ وان ئه‌گه‌ر ئاریشه‌یه‌ك ل په‌نكریاسا كه‌سه‌كى هه‌بت، زانا دیاردكه‌ن تا سالا 2035 زێده‌تر ژ 500 تا 600 ملیون كه‌سا، ئه‌گه‌ر به‌راورد بكه‌ن هه‌ر ده‌ه كه‌سا ئێك كه‌س دێ توش بت.
ل دوماهیێ رێڤه‌به‌رێ سونته‌رێ نه‌خوشیا شه‌كرێ ل دهۆكێ گوت: سال ب سال ئه‌ف نه‌خوشیه زێده دبت سالا بورى ل سه‌نته‌رى روژانه پێنچ نه‌خوش د هاتنه توماركرن، ئه‌ف ساله روژانه 10 نه‌خوش ل سه‌نته‌رى دهێنه توماركرن، گوت ژى: هه‌ر خزمه‌ته‌كا ل سه‌نته‌رێ نه‌خوشیا شه‌كرى بو نه‌خوشا دهێته كرن پاره‌یه‌كێ كێم به‌رامبه‌ر هه‌ر پشكنینه‌كێ و ده‌رمانا دهێته وه‌رگرتن.
ئه‌ڤ مالپه‌ره فرێکه
