پاركه‌ك بو خودان پێدڤیێن تایبه‌ت ل ساخله‌میا دهوكێ هاته‌ ڤه‌كرن

 

وه‌كو خزمه‌ته‌ك و ئاسانكارى بۆ خودان پێدڤیێن تایبه‌ت و ب هه‌لكه‌فتا رۆژاجیهانیا  وان، رێڤه‌به‌ریا گشتى یا ساخله‌میا پارێزگه‌ها دهۆكێ پاركه‌ك تایبه‌ت بۆ ترۆمبێلان وان ڤه‌كر و هژماره‌ك ژ خودان پێدڤیێن تایبه‌ت خه‌لاتكرن.

وه‌حید سه‌عید چیچو، نوونه‌رێ رێڤه‌به‌ریا گشتى یا ساخله‌میا پارێزگه‌ها دهۆكێ دیاركر كو ساخله‌میا دهۆكێ د گه‌له‌ك بیاڤان دا خزمه‌تا خودان پێدڤیێن تایبه‌ت دكه‌ت ژوانژى شیاندنا نوشدارى و زووده‌ستنیشانكرنا په‌ككه‌فتنێ و پشته‌ڤانیا ده‌روونى و گۆت: ڤه‌كرنا ڤێ پاركێ ل دووڤ یاسایا خودان پێدڤیێن تایبه‌ت خزمه‌ته‌كه‌ كو پێدڤیه‌ ل هه‌موو رێڤه‌به‌ریان هه‌بیت و دێ كار هێته‌ كرن ل هه‌موو ده‌زگه‌هێن ساخله‌میێ پارك و جهێن تایبه‌ت بۆ خودان پێدڤیێن تایبه‌ت هه‌بن وه‌كو رێزگرتنه‌ك بۆ وان.

نه‌سره‌دین محه‌مد سه‌لیم، نوونه‌رێ كومه‌لا كێم ئه‌نداما و خودان پێدڤیێن تایبه‌ت ل پارێزگه‌ها دهوكێ خواست ئه‌ڤ هه‌لكه‌فته‌ بیته‌ پالده‌ره‌ك ژبۆ بجهئینانا قانوونا ژماره‌ 22 یا سالا 2011 ده‌رچوویى ب تایبه‌ت ب ماف و ئیمتیازاتێن مه‌ڤه‌ و گۆت: ئه‌ڤرۆ ئه‌م خوه‌ سه‌ربلند و سه‌رفراز دبینین كو چالاكیا ئه‌ڤرۆ ژلایێ رێڤه‌به‌ریا گشتى ساخله‌مییا دهۆكێ ڤه‌ هاتیه‌ ئه‌نجامدان بو ده‌ستنیشانكرنا پاركه‌كا راوه‌ستاندنا ترۆمبێلێن په‌ككه‌فتیا و كێم ئه‌نداما, نسره‌دین كو ب تنێ كێم ئه‌ندام دزانن كا چ ئێش و ئازار هه‌نه‌ ئێك ژوان ئه‌ڤه‌یه‌ كو رێڤه‌به‌ریا ناڤبرى چاره‌كرى, چونكو گه‌له‌ك جارا ب دووراتیا 200 مترا ئه‌ڤ په‌ككه‌فتیه‌ دێ ترومبێلا خوه‌ راوه‌ستینیت و هه‌تا دگه‌هینه‌ جهێ شولێ خوه‌ لڤێره‌ من دڤێت بێژم كو هه‌مى ده‌ما رێڤه‌به‌ریا ساخله‌مییا دهوكێ یا پیشه‌نگه‌هه‌ بو خزمه‌تكرنا ڤێ ته‌خێ، هیڤى خوازین چالاكیا ئه‌ڤرۆ بیته‌ نمونه‌ك ل سنورێ پارێزگه‌ها دهوكێ و هه‌مى رێڤه‌به‌رێن دى چاڤ لێ بكه‌ن, فه‌رمانا ئه‌نجومه‌نێ وه‌زیران هه‌یه‌ لێ ئه‌م نه‌شێین سه‌ردانا هه‌مى ده‌زگه‌هێن میرى بكه‌ین.