وه‌زاره‌تا ئابوورى و گه‌شه‌پێدانا ئه‌لمانیا دێ شه‌ش بنگه‌هێن ساخله‌میێ بۆ ئاواران ئاڤا كه‌ت

وه‌زاره‌تا ئابوورى و گه‌شه‌پێدانا ئه‌لمانیا دێ شه‌ش بنگه‌هێن ساخله‌میێ بۆ ئاواران ئاڤا كه‌ت
شانده‌كێ وه‌زاره‌تا ئابوورى و گه‌شه‌پێدانێ سه‌ر ب حوكمه‌تا ئه‌لمانیا، ب نوونه‌راتیا خاتوون كریستیان هارینموس و ئیپرهالد هلبخ، سه‌ره‌دانا رێڤه‌به‌ریا گشتى یا ساخله‌میا پارێزگه‌ها دهۆكێ كر و بڕیاره‌ شه‌ش بنگه‌هێن ساخله‌میێ ل كه‌مپێن ئاواران و ژووره‌كا نشته‌رگه‌ریا و ته‌نگاڤیا ل بنگه‌هێ گۆلان ل سێمێلێ ئاڤا بكه‌ن.
د.نزار عصمه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو پێدڤیه‌ ل هه‌موو كه‌مپان بنگه‌هێن ساخله‌میێ بهێنه‌ ئاڤاكرن داكو بشێن پتر خزمه‌تا ساخله‌میا ئاواران بكه‌ن و گۆت: پشتى كه‌مپ هاتینه‌ ئاڤاكرن گه‌له‌ك ژ وان د بێ بنگه‌هێن ساخله‌میێ بوون، له‌ورا مه‌ داخوازى پێشكێشى گه‌له‌ك رێكخراو و حوكمه‌تان كرن پشته‌ڤانیێ ل مه‌ بكه‌ن، ئه‌ڤرۆ وه‌زاره‌تا ئابوورى و گه‌شه‌پێدانێ رازیبوونا خوه‌ دیاركر كو پشته‌ڤانیێ ل كه‌رتێ ساخله‌میێ بكه‌ن.
خاتوون كریستیان هارینموس، نوونه‌را وه‌زاره‌تا ئابوورى و گه‌شه‌پێدانێ یا حکومەتا ئه‌لمانیا بۆ كارێن ژده‌رڤه‌ دیاركر كو پشتى گه‌نگه‌شێن وان ل گه‌ل حوكمه‌تا ئه‌لمانیا ئه‌و شیان رازه‌مه‌ندیێ وه‌ربگرن بۆ ئاڤاكرنا شه‌ش بنگه‌هێن ساخله‌میێ ل كه‌مپێن سنورێ دهۆكێ و ل گه‌لدا ژووره‌كا نشته‌رگه‌ریا و پشكا ته‌نگاڤیان ل بنگه‌هێ گۆلان ل سێمێلێ ئاڤا بكه‌ن و گۆت: پشته‌ڤانیا حوكمه‌تا ئه‌لمانیا دبیاڤێ پێشڤه‌برنا ره‌وشا ساخله‌میا ئاواران دێ یا به‌رده‌وام بیت.