ساخله‌میا دهۆكێ 400پلێن دامه‌زراندنێ رادگه‌هینیت
هاتیه بلاڤکرن روژا دوو شه‌مبێ, 22 کانونا بچیک 2014 - 12:09pm
رێڤه‌به‌ریا گشتى یا ساخله‌میا پارێزگه‌ها دهۆكێ 400پلێن دامه‌زراندنێ رادگه‌هینیت و هه‌موو دێ بۆ پشكێن ساخله‌میێ ل زانكۆ و په‌یمانگه‌ه و ئاماده‌ییان بن.
د.هشیار موسا، رێڤه‌به‌رێ پلاندانانێ ل رێڤه‌به‌ریا گشتى یا ساخله‌میا پارێزگه‌ها دهۆكێ دیاركر كو 400 فه‌رمانبه‌ر دێ ل ساخله‌میا دهۆكێ هێنه دامه‌زراندن و گۆت: پشكێن كو دێ هێنه وه‌رگرتن پێكهاتینه ژ ( په‌رستارێن ده‌رچوویێن زانكۆ و په‌یمانگه‌هان، په‌رستارێن شاره‌زا و ده‌رچووێن ناوه‌ندیا په‌رستاریێ و مامانێ په‌یمانگه‌ه و ڤیته‌رنه‌رى، چاره‌سه‌رێن سروشتى، وێنه‌گرێن تیشكێ و هاریكارێن خوپاراستنێ و بێهوشكرنێ).
د.هشیار موسا دیاركر كو ده‌رچوویێن پشكێن ناڤبرى ل زاخۆ، ئاكرێ، ئامێدیى، شێخان، سێمێل و به‌رده‌ره‌ش دشێن هه‌ر ژ سوباهى قه‌ستا رێڤه‌به‌رى و كه‌رتێن ساخله‌میێ ل وان ده‌ڤه‌را بكه‌ن بۆ وه‌رگرتنا فۆرمان و یێن دهۆكێ ژى ل بنگه‌هێ ( به‌هدینان) یێ ساخله‌میێ دێ هێنه وه‌رگرتن، گۆتژى: پرۆسا به‌لاڤكرنا فۆرمان هه‌تا 31/12/2014 و رۆژانه ژ ده‌مژمێر 9 سپێدێ هه‌تا دویێ نیڤرۆ دێ یا به‌رده‌وام بیت.
ده‌رباره‌ى رێنمایێن وه‌رگرتنێ، رێڤه‌به‌رێ پلاندانانا ساخله‌میێ دیاركر كو پێدڤیه ژیێ كه‌سێ داخازا فۆرمێ دكه‌ت ژ 47 سالان ده‌رباز نه‌ببیت و نابیت كه‌سێن به‌رى نوكه دوور كه‌ڤتین دوباره بهێنه داخازا فۆرما بكه‌ن، هه‌روه‌سا دیاركر كو هه‌ڤڕكى دێ ل سه‌ر بنیاتێ ئاكنجیبوونێ بیت و ده‌ستپێك ل هه‌ر قه‌زایه‌كێ دێ بۆ ئاكنجیێ وێ قه‌زایێ بیت یا پێدڤى ب پله‌یا وى هه‌بیت.
دیسا دیاركر كو هه‌ر داخازیه‌كا هاتبیته پێشكێشكرن به‌رى نوكه ناهێته هژمارتن بۆ پێشكێشكرنا فۆرمێ و گۆت: هه‌ر كه‌سه‌كێ فۆرمێ داخاز بكه‌ت دڤێت پشتگیریه‌كا ده‌رچوونێ ل گه‌ل بیت كو ده‌رچوویێ ئێك ژ پلێن مه داخازكرى یه و دیسا سۆزنامه‌یه‌ك دێ ژێ هێته وه‌رگرتن كو ژ (10) خالان پێك دهێت و پێدڤیه پێگیریێ پێ بكه‌ت.
د.هشیار موسا ل دووماهیێ گۆت: ئه‌و كه‌سێن حه‌زا پێشكێشكرنێ هه‌بیت و پتر پێزانینان ل دۆر مه‌رجێن وه‌رگرتنێ بزانیت دشێت سه‌ره‌دانا مالپه‌رێ رێڤه‌به‌ریا گشتى یا ساخله‌میا پارێزگه‌ها دهۆكێ WWW.duhokhealth.org بكه‌ت.
ئه‌ڤ مالپه‌ره فرێکه
