دو بنگه‌هێن ساخله‌میێ ل سه‌رێ چیایێ شنگالێ هاتنه‌ دانان

شانده‌كێ رێڤه‌به‌ریا گشتى یا ساخله‌میا پارێزگه‌ها دهۆكێ، سه‌ره‌دانا چیایێ شنگالێ كر و دو بنگه‌هێن ساخله‌میێ بۆ خزمه‌تكرنا ئاواره‌ و پێشمه‌رگه‌یان ل چیایێ ناڤبرى دانان.
د.نزار عصمه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو هه‌ر ژ ده‌ستپێكێ ساخله‌میا دهۆكێ ب رێیا فرۆكێ شیا تیمه‌كێ ساخله‌میێ بهنێریته‌ چیایێ شنگالێ و ده‌رمان و كه‌لوپه‌لێن پێدڤى بۆ هاتبوونه‌ دابینكرن و گۆت: ئه‌ڤرۆ ب پشته‌ڤانیا پارێزگه‌ها دهۆكێ دو كه‌رڤان هاتنه‌ دابینكرن كو ببنه‌ بنگه‌هێن ساخله‌میێ كو ئێك ژوان دێ بۆ ئاواران بیت و ئێك ژى بۆ پێشمه‌رگه‌یان و ب شه‌ڤ و رۆژ دێ د خزمه‌تێ دابن.
دیاركر ژى كو هژمارا ستافێ ساخله‌میێ و ترۆمبێلێن ئه‌مبۆلانس ژى ل سه‌رێ چیایى هاتنه‌ زێده‌كرن.
د.سیروان محه‌مه‌د ئه‌سوه‌د، رێڤه‌به‌رێ كارۆبارێن خۆپاراستنا ساخله‌میێ دیاركر كو دۆرێن هزار زارۆیان ل سه‌رێ چیایێ شنگالێ ماینه‌ و پێدڤى ب ڤاكسیندانێ هه‌نه‌ و گۆت: مه‌ ل به‌ره‌ ل نێزیكترین ده‌م هه‌وه‌كا ڤاكسیندانێ دژى نه‌خۆشیێن سۆركا و فالنجا زارۆیان بۆ وان زارۆیان ئه‌نجام بده‌ین داكو مه‌ترسیا ڤێ نه‌خوشیێ ل سه‌ر نه‌مینیت.