92 زارۆیێن دهۆكێ پێدڤى ب نشته‌رگه‌ریا جوانكاریا لێڤ و گه‌وریێ هه‌یه
هاتیه بلاڤکرن روژا ئێک شه‌مبێ, 22 شوات 2015 - 1:41pm
تیمه‌كێ نوشدارێن رێكخراوا به‌زاندنا سنوران ل دهۆكێ یه بۆ چاره‌سه‌ركرنا وان زارۆیێن د زكماكدا لێڤ و گه‌وریا وان ڤه‌بووى و رێڤه‌به‌رێ سه‌نته‌رێ نشته‌رگه‌ریا زارۆیان ل دهۆكێ دیاردكه‌ت ناڤێن 92 زارۆیان هاتینه تۆماركرن كو نیڤه‌ك ژوان ئاواره‌نه.
د.ئه‌حمه‌د مریدى نور، ژ كارگێریا پزیشكى و رێڤه‌به‌رێ پرۆگرامێ رێكخراوا نوشدارێن دۆر سنوران دیاركر كو بۆ جارا سیێ یه ئه‌و دهێنه هه‌رێما كوردستانێ و گۆت: گه‌له‌ك فشار ل سه‌ر پارێزگه‌ها دهۆكێ هه‌یه و پێدڤیه ئه‌م هاریكاریا وان بكه‌ین و ڤێ جارێ مه ل به‌ره هژماره‌كا زارۆیێن كو لێڤ و گه‌وریا وان ڤه‌بووى چارسه‌ربكه‌ین و نوشدارێن تایبه‌تمه‌ند ب نشته‌رگه‌ریا جوانكاریێ و راستڤه‌كرنێ دێ ب ڤى كارى رابن.
دیاركر ژى ئارمانجا وان ئه‌وه 60 نشته‌رگه‌ریان ئه‌نجام بده‌ن و ئه‌ڤه پالپشتیێ ل سه‌ر ماوێ نشته‌رگه‌ریان و ده‌مێ تیمى دمینیت و ره‌نگه پیچه‌ك كێمتر بهێنه ئه‌نجامدان و ئاواره و خه‌لكێ پارێزگه‌ها دهۆكێ ژى دناڤدا هه‌نه و ئه‌ڤه ده‌ستپێكه و پشتى هه‌یڤه‌كا دیتر ژى دێ هنده‌كێن دیتر ئه‌نجام ده‌ین.
د.قادر محه‌مه‌د صالح، رێڤه‌به‌رێ سه‌نته‌رێ نشته‌رگه‌ریا زارۆیان دیاركر كو ناڤێن 92 زارۆیان ل دهۆكێ هاتینه تۆماركرن و نیڤه‌ك ژوان هه‌كه پتر نه‌بن زارۆیێن ئاواره‌نه و گۆت: ئه‌نجامدانا نشته‌رگه‌ریێ پێدڤى ب كاركرنێ وه‌كو تیم هه‌یه داكو جوانكارى و راستڤه‌كرن بۆ لێڤێن وان وان زارۆیان بهێته كرن.
ئه‌گه‌رێن وێ ڤه‌دگه‌رن بۆ كێماسیێن زكماكى وه‌كو ب كارئینانا ده‌رمانان و كێمبوونا كه‌رستێ فولیك ئه‌سید دناڤ له‌شێ دایكێ دا و گۆت: پێدڤیه ل ده‌مێ دوگیانیێ كه‌رستێ فولیك ئه‌سید بۆ ژنێ بهێته دان داكو تووشى ڤان جوره كێماسیان نه‌بن.
دیاركر ژى ئه‌و زارۆ پتریا جاران دناڤبه‌را سێ هه‌تا شه‌ش هه‌یڤیێ دا دهێنه نشته‌رگه‌ریكرن و هنده‌ك ژى گه‌هشتینه 16 سالیێ و ژنوو دێ هێنه نشته‌رگه‌ریكرن و گۆت: هه‌كه نه‌هێنه نشته‌رگه‌ریكرن كارتێكرن ل ده‌نگ و ئاخفتنا وان دبیت، له‌ورا دڤێت كارێ پێدڤى بۆ بهێته كرن.
ئه‌ڤ مالپه‌ره فرێکه
