ساخله‌مى و هاتنوچوونێ ب هه‌ڤپشكى ده‌ست ب ڤاكسیندانێ كر

هه‌وا ڤاكسیندانێ دژى نه‌خوشسا فالنجا زارۆیان و سوركان ب هه‌ڤكاریا رێڤه‌به‌ریا كاروبارێن خوپاراستنێ و رێڤه‌به‌ریا هاتنوچوونێ و قایمقامیا دهوكێ و ب پشته‌ڤانیا رێكخراوێن یونسێف و ساخله‌میا جیهانى ده‌ستپێكر و بۆ ده‌مێ 15 رۆژا دێ به‌رده‌وام بیت.
د. سیروان مه‌حمه‌د ئه‌سوه‌د، رێڤه‌به‌رێ كارۆبارێن خوپاراستنا ساخله‌میێ دیاكر ئه‌ڤ هه‌وه‌ دێ بۆ ده‌مێ 15 رۆژان ڤه‌كێشیت و ڤاكسینێ نه‌خوشیا فالنجا زارۆیان بۆ زارۆیێن ئێك رۆژى هه‌تا پێنج سالى یه‌، به‌لێ یا نه‌خۆشیا سۆركا دێ بو زارۆیێن نه‌ه هه‌یڤى هه‌تا پێنج سالى بیت، و گۆت: هه‌كه‌ به‌رى هینگى زارۆى ئه‌ڤ ڤاكسینه‌ وه‌رگرت بن دێ هه‌ر بو وان هێته‌ دانان، چونكو نێزیكى ملیونه‌كا ئاواره‌یان ل پارێزگه‌ها دهوكێ هه‌نه‌، ئه‌ڤ نه‌خوشیه‌ ل گه‌له‌ك پارێزگه‌هێن عێراقێ یا به‌ربه‌لاڤ بووى، ل به‌غدا و مووسل و كه‌ركووك و چه‌ندین حاله‌تێن نه‌خوشیا سوركا هه‌بووینه‌.
عه‌مید فه‌خرى ئه‌حمه‌د، رێڤه‌به‌رێ هاتنوچوونا دهۆكێ دیاركر كارێ رێڤه‌به‌ریا هاتنوچوونێ دگه‌ل یێ ساخله‌میێ هه‌ڤپشكه‌، له‌ورا مه‌ ب فه‌ر زانى پشكداریێ دهه‌وا ڤاكسیندانێ بكه‌ین و گۆت: هندى دشیانێن مه‌دا هه‌بن دێ پشته‌ڤان و هاریكاربین دگه‌ل ساخله‌میێ ، هیڤى خوازین ژ هه‌موو لایه‌نان هاریكارو پشته‌ڤان بن ژ بو سه‌ركه‌ڤتنا هه‌وێن ڤاكسیندانێ .
بوتان محسن، قایمقامێ قه‌زا دهوكێ خویاكر ژ به‌ركاودانێن عیراق و هه‌رێم تێدا ده‌رباز دبیت، و ئالوزیێن دارایى، یا گرنگه‌ ئه‌ڤ هه‌وه‌ بهێنه‌ئه‌نجام دان، وگۆت: وه‌كو یا دیاره‌ ئه‌ڤ نه‌خوشیه‌ ل ناف مه‌دا د كێمبوون، به‌لێ ب هاتنا ئاواران ژ ده‌ڤه‌رێن دى یێن عێراقێ، بوویه‌ ئه‌گه‌ر ئه‌ڤ  نه‌خوشیه‌ په‌یدا ببن، له‌ورا ڤاكسیندان رێیا ئێكانه‌یه‌ بۆ پاراستنا زارۆیان.