بنگه‌هه‌كێ ساخله‌میێ بۆ ئاوارێن ل خانكێ هاته ڤه‌كرن
هاتیه بلاڤکرن روژا شه‌مبی, 28 شوات 2015 - 7:17pm
ب هاریكاریا ده‌زگه‌هێ AMAR یێ بریتانى و ب ئاماده‌بوونا هاریكارێ پارێزگارێ دهۆكێ بۆ كارۆبارێن ئاواران، و نوونه‌رێن رێكخراوا رێیێن سه‌ركه‌فتنێ یا ئه‌مریكى، بنگه‌هێ چاڤدێریا ساخله‌میا ده‌ستپێكى ل كه‌مپا خانكێ هاته ڤه‌كرن.
بارونێیه نیكلسون، رێڤه‌به‌را ده‌زگه‌هێ AMAR یێ خێرخازى دیاركر كو بنگه‌ه ب كوژمێ 125 هزار دولاران هاتیه ئاڤاكرن و ڤه‌كرنا ڤى بنگه‌هى وه‌كو پشته‌ڤانیه بۆ رێڤه‌به‌ریا گشتى یا ساخله‌میا پارێزگه‌ها دهۆكێ و گۆت: ل ده‌ستپێكا ئیمزاكرنا گرێبه‌ستا مه بڕیار ئه‌وه بۆ ده‌مه‌كى ئه‌م رێڤه‌به‌ریا بنگه‌هى ژى بكه‌ین و برێڤه‌ببه‌ین داكو بارسڤكى بكه‌ڤیته ل سه‌ر ساخله‌میا دهۆكێ و هه‌موو خزمه‌تێن ساخله‌میا ده‌ستپێكى ل ڤى بنگه‌هى هه‌نه و ل ده‌مێن پێدڤى دێ مفاى گه‌هینیت ئاواران و هه‌كه مه شیان هه‌بن دێ گه‌له‌ك كارێن دى ئه‌نجام ده‌ین.
د.نزار عصمه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو ئه‌و دێ مفایه‌كێ باش ژ سه‌ربوورا ڤى ده‌زگه‌هى د پێشكێشكرنا خزمه‌تێن ساخله‌میێ بۆ ئاواران دا بینن و ب ئاڤاكرنا ڤى بنگه‌هى دێ شێین خزمه‌تێن ساخله‌میێ به‌رفره‌هتر لێ كه‌ین، نه‌خاسمه كو نوكه دۆرێن 16 كه‌مپا ل سنورێ پارێزگه‌ها دهۆكێ دهێنه ئاڤاكرن و ل ده‌ستپێكا ئاڤاكرنا وان هزرا چو بنگه‌هێن ساخله‌میێ نه‌هاتیه كرن، و گۆتژى: نوكه كار ل ئاڤاكرنا بنگه‌هێن ساخله‌میێ ل پرانیا كه‌مپان دهێنه كرن و ل ده‌مه‌كێ نێزیك هه‌موو كه‌مپ دێ بنه خودانێن بنگه‌هێن ساخله‌میێ یێن تایبه‌ت.
ئه‌ڤ مالپه‌ره فرێکه
