ساخلهمییا جیهانى ژنێزیك هایدارى رهوشا ئاوارهیێن پارێزگهها دهۆكێ بوو
ب مهرهما ژ نێزیك هایداربوون لسهر رهوشا ساخلهمییا ئاوارهیێن پارێزگهها دهۆكێ، دوهی وهزیرێ ساخلهمییا ههرێما كوردستانێ و بهرپرسێ رێكخراوا ساخلهمییا جیهانی ل رۆژههلاتا ناڤهراست و باكۆرێ ئهفریقیا، ههروهسا هونهرمهندێ ناڤدارێ ئیراقی نهسیر شهممه نوونهرێ نیازپاكیێ ل رێكخراوا ساخلهمییا جیهانى سهرهدانا رێڤهبهرییا گشتییا ساخلهمییا دهۆكێ دا و ههژمارهكا ئهمبۆلانس و دهرمانێن پێدڤی پێشكێشكرن.
د. رێكهوت حهمهرهشید وهزیرێ ساخلهمییا ههریمێ راگههاند، جهێ خوشحالیێ یه تا نها چ جور ژ نهخۆشیێن گران ل ناڤ ئهڤێ ههژمارهیا بلند كو نێزیكی ملیون و نیڤ ئاوارهیان نههاتینه دیتن و مه پێشبینییا هندهك نهخۆشییان دكر، وهكو كولیره و فالنجا زارۆكان، لێ ب پشتهڤانییا ههموو ئالیهكى د وان ههوێن بهردهوام دا چ جوره نهخۆشییهكا مهترسیدار پهیدا نهبوو.
وهزیرێ ساخلهمیێ داخواز ژ حوكمهتا ئێراقێ و رێكخراوێن جیهانی كر، كو زێدهتر هاریكارییا ههرێمێ بكهن چونكی گرانى ههموو لسهر ملێن حوكمهتا ههرێما كوردستانێ یه.
ژلایێ خۆ ڤه عهلا عهلوان بهرپرسێ رێكخراوا ساخلهمییا جیهانی ل رۆژههلاتا ناڤهراست ژی د ڤێ سهرهدانا خۆ دا بۆ پارێزگهها دهۆكێ، بزاڤێن حوكمهتا ههرێمێ ب بلند نرخاندن ژبۆ هاریكاریكرنا ئاوارهیان و گۆت: ئارمانجا سهرهدانا مه بۆ پارێزگهها دهۆكێ بۆ وێ یهكێ بوو كو ئهم ژ نێزیك هایداری رهوشا ساخلهمییا ئاوارهیان بین،
ناڤهاتى ئاماژهكر، كو پلانهكا ههڤپشك دگهل وهزارهتا ساخلهمییا ههرێمێ ههیه ژبۆ هاریكاریكرنا ئاوارهیان و دیسا دڤێ سهرهدانێ دا مه چهندین ئهمبۆلانس و دهرمانێن پێدڤی بۆ ئێشێن گران دگهل خۆ ئینان، دوپاتكر ژى ئهڤ هاریكاریه دێ د بهردهوام بن.
ل دهمهكى د. نزار عسمهت رێڤهبهرێ گشتیێ ساخلهمیێ ل پارێزگهها دهۆكێ لدۆر سهرهدانا ئهڤی شاندی دبێژیت: هاتنا شاندێ ناڤهاتى یا گرنگ بوو چونكی گهلهك كێماسی و پێدڤی ههنه مه دانانه بهردهستێ وان ژبۆ دابینكرنا وان پێدڤیێن ساخلهمیێ، بۆ وێ یهكێ زێدهتر پشێن پشتهڤانییا ساخلهمییا پارێزگهها دهۆكێ بكهن ژبهركو ئهو بارگرانییا ل دهۆكێ دروست بووی ژ ههموو جهان زێدهتره و ئهو كێماسی ژی یێن ل دهۆكێ ههین ژ ههموو جهان زێدهترن.
ههر د سهرهدانا خوه دا بۆ پارێزگهها دهۆكێ شاندێ ناڤهاتى بنگههێ ساخلهمییا دهستپێكى ل كهمپا باجد كهندالا یا ئاوارهیێن شنگالێ ڤهكر و ژنێزیك لسهر رهوشا ساخلهمییا ئاوارهیان راوهستیان.\