شاندێ نوشدارێن ئه‌مریكى گه‌هشته دهوكێ
هاتیه بلاڤکرن روژا ئێک شه‌مبێ, 5 نيسان 2015 - 7:34pm
ئه‌كادیمیا نشته‌رگه‌رێن ئه‌مریكى دێ پشكه‌كا خوه ل كوردستانێ ڤه‌كه‌ت
شانده‌كێ نوشدارێن ئه‌مریكى دوهى گه‌هشته پارێزگه‌ها دهۆكێ و بڕیاره هژماره‌كا نشته‌رگه‌ریان بۆ نه‌خۆش و پێشمه‌رگێن بریندار ئه‌نجام بده‌ن و سه‌رۆكێ شاندى دیاردكه‌ت ل ده‌مه‌كێ نێزیك پشكه‌كا ئه‌كادیمیا نشته‌رگه‌ریێن ئه‌مریكى ل كوردستانێ دێ ڤه‌بیت.
د. نزار عصمه‌ت، رێڤه‌به‌رێ گشتیێ ساخله‌میا پارێزگه‌ها دهۆكێ دیاركر كو شاندێ ناڤبرى پێكهاتیه ژ تایبه‌تمه‌ندیێن جورا و جور، نشته‌رگه‌رى و په‌نجه‌شێرێ، مێلاكێ و په‌نكریاسێ و نشته‌رگه‌رێن دووربینێ و نوشدارێن هه‌وارهاتنا بله‌ز و ته‌نگاڤیا ومێشك و كۆما ده‌ماران و گۆت: هژماره‌كا نه‌خوشان هاتینه ئاماده‌كرن كو ره‌وشا وان یا ئالوزبوویه و نشته‌رگه‌ریێن پێدڤى دێ بو هێنه ئه‌نجامدان.
هه‌روه‌سا دیاركر كو شاندێ ناڤبرى هه‌تا دووماهیا ڤێ حه‌فتیێ دێ ل پارێزگه‌ها دهۆكێ بیت و هه‌ر پێشمه‌رگه‌یه‌كێ پێدڤى ب نشته‌رگه‌ریێ بیت و دشیاندا بیت دێ بۆ هێته‌كرن
د. غازى زێبارى، سه‌رپه‌رشتێ تیمێ نوشدارى یێ ئه‌مریكى دیاركر هه‌ر ژ سالا 1992 وه‌ره چه‌ند نوشدارێن تایبه‌تمه‌ندێن جورا و جور دهێنه كوردستانێ كو بوینه دوستێن ملله‌تێ كورد و هنده‌ك ئه‌ڤه حه‌فت ساله به‌رده‌وام دهێن و خزمه‌تا ملله‌تێ كورد دكه‌ن و گۆت: ئه‌ڤ ساله مه تایبه‌ته‌مه‌ندى یا دایه نوشدارێن ته‌نگاڤیا و هه‌ر چ ژ مه بهێت دێ خزمه‌تا پێشمه‌رگێ خوه كه‌ین، و دبیت ئه‌ڤه بچویكترین خزمه‌ت بیت به‌رامبه‌ر ئه‌و خوینا خوه گورى ڤى ملله‌تى و جیهانى كرى.
دیاركر ژى ئه‌و دێ ب گێرانا چه‌ند سمیناران ل دور حاله‌تێن ته‌نگاڤیا بو نوشدارێن نه‌خوشخانا ته‌نگاڤیا گێرین و گۆتژ ى:مه‌ره‌ما مه یا سه‌ره‌كى ئه‌وه ئه‌م هه‌مى شیانێن خو بمه‌زێخین كو نه‌خوشخانێن مه ل كوردستانێ وه‌لێ بهێن هیچ جاره‌كێ نه‌خوشێ كورد پێدڤى ب ده‌رڤه‌ى كوردستانێ نه بیت ل ده‌مه‌كێ نێزیك دێ ئه‌كادیمیا نشته‌رگه‌رێن ئه‌مریكى پشكه‌كا خوه ل كوردستانێ ڤه‌كه‌ت ب ڤێ چه‌ندێ دێ په‌یوه‌ندى موكمتر لێ هێن، دڤێ جارێ دێ سمیناره‌كى ل دور نووترین پێشهاتێن زانستیا نوشدارى پێشكێش كه‌ین دگه‌ل نوشدارێن خوه ئاگه‌هدار كه‌ین و چه‌ند نشته‌رگه‌رێن ئالوز پێكڤه كه‌ین و مفایێ بگه‌هینینه هه‌میان.
ئه‌ڤ مالپه‌ره فرێکه
