بۆ به‌رسینگرتنا كۆلێرایێ‌ ل كه‌مپان ساخله‌می خۆ به‌رهه‌ڤ دكه‌ت

ژبۆ به‌رسنگرتنا نه‌خۆشییا كۆلێرایێ‌ دناڤ كه‌مپێن ئاواره‌یان ل پارێزگه‌ها دهۆكێ‌، ساخله‌میێ‌ ده‌ست ب به‌رهه‌ڤیێن خوه‌ كریه‌ د پێشڤه‌برنا شیانێن نوشدارێن ل كه‌مپان كاردكه‌ن.
دڤێ ده‌ربارێ‌ دا د. كاوه‌ محه‌مه‌د ئه‌مین به‌رپرسێ پشكا ئێشێن ڤه‌گر ل رێڤه‌به‌ریا كاروبارێن خوپاراستنێ‌ ل پارێزگه‌ها دهۆكێ‌ دیاركر، پشتی دگه‌ل رێكخراوێن بیانێ‌ پلانا به‌رسینگرتنا نه‌خۆشییا كۆلێرایێ‌ هاتیه‌ به‌حسكرن، بۆ ماوه‌یێ‌ دو رۆژانه‌ نوشدارێن دناڤ كه‌مپێن ئاواره‌یان ل پارێزگه‌ها دهۆكێ‌ د خۆله‌كێ دا پشكدارن لسه‌ر چاوانیا ده‌ستنیشانكرنا نه‌خۆشییا كولێرایێ‌ دناڤ ئاواره‌یان ژبۆ هندێ‌ ئه‌گه‌ر حاله‌ته‌كێ‌ نه‌چاڤه‌رێكری هاته‌ پێش سه‌ره‌ده‌ریه‌كا دروست دگه‌ل نه‌خۆشی بهێته‌ كرن بۆ هندێ‌ به‌ربه‌لاڤ نه‌بیت.
ئاماژه‌كر قوناغا ئێكێ‌ نوشدار دڤان خولاندا دێ‌ پشكداربن، پاشان كادرێ‌ ساخله‌میێ‌ ل ناڤ كه‌مپێن ئاواره‌یان بۆ هندێ‌ زێده‌ر خزمه‌تا وان بهێته‌كرن.
سه‌باره‌ت نه‌خۆشخانه‌یێن پارێزگه‌ها دهۆكێ‌ ژی به‌رپرسێ‌ پشكا ئێشێن ڤه‌گر گۆت: پشتی خول بۆ كادرێ‌ ساخله‌میێ‌ یێن ناڤ ئاواره‌یان ب دوماهی دهێن ده‌ملده‌ست دێ‌ لسه‌ر نه‌خۆشخانه‌یێن پارێزگه‌ها دهۆكێ‌ كاركه‌ین.