ل دھۆکێ کەمپینەکا بەخشینا خوینێ ھاتە ڤەکرن

ب مەرەما دابینکرنا خوینێ د مەھا رەمەزانا پیرۆز دا، ب پشتەڤانیا پارێزگارێ دھۆکێ رێڤەبەریا خزمەتێن ڤەگوھاستنا خوینێ سەر ب رێڤەبەریا گشتی یا ساخلەمیا پارێزگەھا دھۆکێ کەمپینەک بۆ بەخشینا خوینێ دانا.

د.سیروان محەمەد ئەسوەد، رێڤەبەرێ گشتیێ ساخلەمیا پارێزگەھا دھۆکێ ب وەکالەت دیارکر کو ژبەرکو ل مەھا رەمەزانێ خەلک ب رۆژێ خوینێ نابەخشن و دیسا ھەبوونا ھژمارەکا مەزن یا ئاوارا ل پارێزگەھا دھۆکێ و شەرێ مە ل گەل تیرۆرستێن داعش، ئەڤە ھەمی دبنە ئەگەر کو پێدڤی ب خوینێ دبن و گۆت: ئارمانجا مە پەیداکرنا خوینەکا ساخلەمە بۆ نەخۆشان و پاراستنا ساخلەمیا خوینبەخشان، لەورا ل ھەر دەمێ خوین بھێتە دان ھەموو پشکنین بۆ ھەرۆدو لا دھێنە کرن بەری خوین بھێتە دان.

کەمپینا بەخشینا خوینێ ھەر شەڤ ل دەمژمێر ٨:٣٠-١٢:٠٠ شەڤ ل گەلەریا دھۆک یا شێوەکاری دێ پێشوازیێ ل خوینبەخشان کەن.