٤١٨ نەخۆشان گیانێ خوە ژدەستدایە

پتری ھزار نەخۆشێن پەنجەشێرێ د سالەکێ دا ل دھۆکێ ھاتینە تۆمارکرن

ل پارێزگەھا دھۆکێ نەخۆشیا پەنجەشێرێ دزێدەبوونێ دایە، پتریا جورێن دھێنە تۆمارکرن پەنجەشێرا مەمکانە ل دەڤ ژنان کو ١٤٨ ژن ژ ئەگەرێ وێ مرینە، ٣٧٥٠ نەخۆش ل دەزگەھێن ساخلەمیێ ھاتینە تۆمارکرن، ئەڤ رێژە پترە ژ پارێزگەھێن دی ژبەر ھەبوونا ئاوارە و پەنابەرا، پتریا نەخۆشێن قەستا دەرڤەی وەلاتی دکەن ڤەدگەرنەڤە، ژبەرکو شیانێن چارەسەریێ نینن، بەلێ ھندەک نەخۆش ل ناڤ ھەرێمێ ژی بۆ دەمێ حەفت ھەیڤان ل ھیڤیا چارەسەریا ب تیشکێ دمینن، ل پارێزگەھا دھۆکێ دسالەکێ پتری ھزار نەخۆشان ھاتینە تۆمارکرن و ٤١٨ نەخۆشان گیانێ خوە ژدەستدایە.

ئەڤرۆ، بەرپەرێ ساخلەمیێ:

د.زەکی عەلی بەرواری، تایبەتمەندێ پەنجەشێرێ و نەخۆشیێن خوینێ دیارکر کو ١٠٢٢ نەخۆشێن پەنجەشێرێ ل سنورێ پارێزگەھا دھۆکێ ل سالا بۆری نوو ھاتینە تومارکرن، ٧٥٧ ژێ ئاکنجیێن دھۆکێ و ٢٦٥ نەئاکنجیێن پارێزگەھێ نە، ئانکو ئاوارە و پەنابەرن و گۆت: پترین جورێن پەنجەشێرێ ل دھۆکێ ھاتینە تومارکرن پەنجەشێرا مەمکی بوویە ل دەڤ ژنان کو ١٤٨ نەخۆش ھاتینە تۆمارکرن.

د.زەکی عەلی، دیارکر ژی ل سالا بۆری ٤١٨ نەخۆشان گیانێ خوە ژدەستدایە، و ھەکە ل گەل سالا ٢٠١٤  بەراوەرد بکەین دێ دیاربیت ١٠٨ نەخۆشان پتری وێ سالێ گیانێ خوە ژدەستدایە و گۆت: ئەگەرێن وێ ڤەدگەرن بۆ وێ چەندێ کو سیستەمێ تومارکرنێ باشتر لێ ھاتیە و پێزانین ل سەر ھەر نەخوشەکی باشترن و دیسا پتریا وان تووشبوویێن پەنجەشێرا مەمکی بووینە، ب رەنگەکێ گشتی ٣٧٥٠ نەخۆشێن پەنجەشێرێ ل پارێزگەھا دھۆکێ ھەنە کو ھندەک ژوان رەنگە شەش جارا قەستا مە یا کری و ل دھوکێ ل ھەمبەر پارێزگەھێن دی رێژا نەخوشیێ پترە، چونکو ھژمارا ئاوارا ل پارێزگەھا دھۆکێ پترە.

د.زەکی عەلی، بەرپرسێ سەنتەرێ نەخۆشیێن پەنجەشێرێ ل دھۆکێ ئەوژی دیارکر کو ھەموو جورێن خزمەتا ل پارێزگەھا دھۆکێ بۆ نەخۆشێن پەنجەشێرێ دھێنە تۆمارکرن، بگرە دەستنیشانکرن ب ھەموو رەنگان و پێدانا چارەسەریێ بۆ ھەموو نەخۆشان و گۆت: سەرەرای وێ چەندێ کو کێماسی ددەرمان دا ھەیە و ژلایێ حوکمەتا بەغدا وەکو پێدڤی ناھێنە دان، بەلێ ئەم شیاین ھەتا رادەیەکێ مەزن بۆ نەخۆشان دابین بکەین کو کارتێکرن ل وان نەبیت.

ھەروەسا دیارکر ژی کو یا ب زەحمەتە نەخۆشەکێ پەنجەشێرێ ھەموو مەزاختنان ل سەر کیستێ خوە بکەت و قەستا دەرڤەی وەلاتی بکەت بۆ چارەسەریێ و گۆت: ھەموو نەخۆشێن قەستا دەرڤەی وەلاتی دکەن، پەشیمان دبن و دوبارە دھێنە دھۆکێ بۆ تەمامکرنا چارەسەریا خوە.