بەرھەڤکاری بۆ چارەسەرکرنا ١٦٠٠ ژن و زارۆیێن ئاوارە ل سوێد دھێنە کرن

قایمقامێ قەزا شنگالێ ل گەل رێڤەبەرێ گشتیێ ساخلەمیا پارێزگەھا دھۆکێ کۆمبوو و چەند بابەتێن گرێدای ئاوارەیان ھاتنە گەنگەشەنکرن.

مەحما خەلیل، قایمقامێ قەزا شنگالێ دیارکر کو ھژمارەکا دەرمانان ل بەر دەست ھەنە بۆ دەزگەھێن ساخلەمیێ سەر ب شنگال ڤە و خواست لیژنەیەک بھێتە پێکئینان کو ب زووترین دەم ھەموو دەرمان ل سەر دەزگەھێن ساخلەمیێ ل سنورێ بھێنە دابەشکرن.

ھەروەسا دیارکر رێکخراوەکێ ئامادەبوونا خوە دیارکریە بۆ چارەسەرکرنا ژن و زارۆیێن ئاوارە کو ل ژێر دەستێ داعش رزگاربووینە و ھندەک ژی دبێ سەمیانن و گۆت: دۆرێن ١٦٠٠ کچ و زارۆیێن ب ڤی رەنگی ھەنە و پێدڤیە بھێنە چارەسەرکرن، و خواست ساخلەمیا دھۆکێ ھەڤکاربیت دڤی واری دا.

د.نزار  عصمت، رێڤەبەرێ گشتیێ ساخلەمیا پارێزگەھا دھۆکێ دیارکر کو ژێرخانا ساخلەمیێ ل شنگالێ پێدڤی ب پشتەڤانیێ ھەیە و گۆت: پێدڤیە کار ژبۆ ئاڤاکرنا نەخۆشخانەیەکا مەزن ل وێ دەڤەرێ بھێتە کرن، ھەروەسا دیارکر ژی ئەو دێ لیژنەیەکێ پێک ئینن بۆ ھندێ دەرمان ب شێوەیەکێ باش و ب سەرپەرشتیا قایمقامیا شنگالێ بۆ دەزگەھێن ساخلەمیێ بھێنە دان.

رێڤەبەرێ گشتیێ ساخلەمیا پارێزگەھا دھۆکێ دیارکر ژی کو ھەتا نوکە شیاینە ٧٩٠ کچ و ژنێن ل ژێ{ دەستێ داعش رزگاربووین چارەسەربکەن و گۆت: ھەبوونا ١٦٠٠ کەسێن دی پێدڤی ب پرۆگرامەکێ درێژ خایەن یێ چارەسەریێ ھەیە، لەورا دشیانێن ساخلەمیا دھۆکێ دا ب تنێ دا نینە ڤی ئەرکی ب ستوویێ خوە بگریت، ژبۆ ھندێ ئەو دێ لیژنەیەکێ پێک ئینن کو ل سەر وان ١٦٠٠ کەسان براوەستیت و ب ھەڤکاریا قایمقامیا شنگالێ ھەموو پێدڤیێن وان ئامادەبکەت بۆ ھنارتنا دەستپێکێن وان بۆ وەلاتێ سوێد داکو ژلایێ دەروونی و جڤاکی بھێنە ڤەشیاندن.

ئامادەبوونا ساخلەمیا دھۆکێ ژی دبیاڤێن جودا جودا دا بۆ پشتەڤانیا قایمقامیا شنگالێ نیشان دا.