پلانا ساخلەمیێ بۆ شەرێ رزگارکرنا مووسل ھاتە راگەھاندن

داکو کێمترین زیان ھەبن و خزمەتێن ساخلەمیێ بگەھنە ھەموو وەلاتیان، رێڤەبەریێن گشتی یا ساخلەمیا پارێزگەھا دھۆکێ و مووسل ل گەل رێکخراوا ساخلەمیا جیھانی کۆمبوون و گەنگەشە ل دۆر چاوانیا پێشکێشکرنا خزمەتێن ساخلەمیێ ھاتە کرن.

د.نزار عسمت، رێڤەبەرێ گشتیێ ساخلەمیا پارێزگەھا دھۆکێ دیارکر کو ئارمانج ژ کۆمبوونێ خوە بەرھەڤکرن ژبوو بۆ ئوپەراسیونا مووسلێ و خورتکرنا ھەماھەنگیێ دناڤبەرا دەزگەھێن ساخلەمیا دھۆک و مووسلێ و دەستنیشانکرنا ئاریشێن ساخلەمیێ ل دەمێ رزگارکرنا باژێری.

دیارکر ژی پلانێن پێدڤی بۆ چاوانیا پێشوازیکرنا وەلاتیان ل ھەر پێنج دەرگەھێن ددەست پێشمەرگێ کوردستانێ دا و گۆت: ئەم شیاین ھژمارەکا تیمێن ساخلەمیێ یێن ھەڤپشک بۆ ڤێ مەرەمێ پێک بینین کو بۆ دەمێ ٢٤ دەمژمێرا دێ دکاری دا بن و خزمەتێن چارەسەری و خۆپاراستنێ دێ پێشکێشی ئاوارا کەن ھەر ژ پێشوازیێ ھەتا دھێنە نیشتەجێکرن دناڤ کەمپان دا.