دھۆکێ : ل جەژنێ ٦٩٨ زارۆک ژ دایک بووینە

بەرپرسێ پشکا راگەھاندنێ ل رێڤەبەریا گشتیی ساخلەمیا پارێزگەھا دھۆکێ دیارکر ل جەژنێ ٦٩٨ زارۆک ژ دایک بووینە ژوانا ژی ٣٧٩ کچ و ٣١٩ کور، ٤٣ کەسان ژ ئەگەرێن جودا جودا گیانێ خوە ژ دەستداینە.

حەمزە رەزیکی، بەرپرسێ پشکا راگەھاندنێ ل رێڤەبەریا گشتیی ساخلەمیا پارێزگەھا دھۆکێ دیارکر ١٧٤١٨ نەخۆشان سەرەدانا نەخۆشخانێن دھۆکێ داینە، ٢٧٤ روودان ژ کەتن و سوتن و بریندابوونێ و ھنگاڤتنا ترۆمبێلان ل دھۆکێ پەێدابووینە و ٢١ روودانێن ترۆمبێلان ل نەخۆشخانێن دھۆکێ ھاتینە تۆمارکرن و ٦٣ کەس تووشی ھنگاڤتنێ بووینە و ھەشت کەسا ژ ئەگەرێن روودانێن ھاتن وچوونێ گیانێ خوە ژ دەستداینە.

خۆیا ژی کر ١٧٠ کەسا سەرەدانا نەخۆشخانا سۆتنێ کریە وب ھاتنا شاندەکێ نۆشدارێن یابانێ شیانیە ٣٠ نەۆشان نشتەگەری بکەن، ٢٤ جەنازە یێن گەھشتینە پزیشکیا داد بۆ دیارکرنا ئەگەرێن مرنێ و ٩١ کەسا پەێوەندی ب ١٢٢ کریە و ٨ روودانێن ترۆمبێلا بووینە و ٥ حالەتێن جەلتێ و ٥ زارۆکبوون و دوو مرن یێن دیتر جۆرا و جور بووینە.

دبێژت "ژبلێ روودانا ٣٥ کەسا ژ ئەگەرێ جودا جودا گیانێ خوە ژ دەستداینە کو ١١ زارۆک ل نەخۆشخانا ھیڤی مرینە و ١١ نەخۆش ل نەخۆشخانا ئازادی یێن دیتر ژی ژ ئەگەرێن جودا جودا بووینە، ١٦٧ کریارێن نشتەگەری یێن ھاتێنە کرن بۆ نەخۆشان".