ساخلەمیێ ٢٤ جھێن گشتی گرتن و سزادان

  پشکا چاڤدێری و سلامەتییا خۆراکی ٢٤ جھێن گشتی د مەھا نیسانێ دا ل پارێزگەھا دھۆکێ دائێخستن و سزادان.

عسمەت سەلمان بەرپرسێ پشکا چاڤدێری و سلامەتییا خۆراکی ل رێڤەبەرییا کاروبارێن خوپاراستنا ساخلەمیێ دیارکر، د بەردەوامییا کارێ تێمێن دوڤچوونا جھێن گشتی دا ل پارێزگەھا دھۆکێ، د مەھا نیسانێ دا ٢٤ جھێن گشتی ژ خوارنگەھـ و مارکێت و سەرتراشخانەی و نانپێژی و سەمونخانە گرتن و سزادان.

ھەروەسا گۆت: زێدەباری گرتنا وان جھان، تێمێن وان ھوشداری دایە ٧٢ جھێن گشتی، دوپات ژی کر کو ئەگەرێن ھوشداری و سزادانا جھێن گشتی ژبەر نەپێگرییا وانە ب رێنمایێن ساخلەمیێ.

بەرپرسێ پشکا چاڤدێری و سلامەتییا خۆراکی داخواز ژ وەلاتییان کر ھاریکار بن دگەل تیمێن وان بۆ وێ یەکێ ژ نەخوەشییان بھێن پاراستن.