گلێشێ نوشدارى ژ يێ مالان دهێته‌ جوداكرن

 بەرپرسێ چارەسەرکرنا بەرمایکێن نوشدارى ل ساخلەمیا دھۆکێ دیارکر کو بەرمایکێن نوشداری مەترسینە و نابیت ل گەل بەرمایکێن مالان بھێتە تێکەلکرن ب تایبەتی گلێشێ نشتەرگەریان و تاقیگەهان و ئەڤ گلێشه‌ ل سۆتنگەھێن نەخۆشخانان دھێتە چارەکرن.

د. به‌یره‌م داود، بەرپرسێ چارەکرنا بەرمایکێن نوشدارى ل ساخلەمیا دھۆکێ بۆ (نوش نیوز) دیارکر کو ئەو ھەموو بزاڤان دکەن گلێشێ ساخله‌ميێ یێ دوور بیت ژ بەر دەستی وەلاتیان دا کو خەلک تووشی نەخۆشیان نەبن و گۆت: “نوکە ل دھۆکێ ترۆمبێلەکا تایبەت گلێشێ نوشداری کۆم دکەت، ئەم رێ نادەين د ناڤ گلێشێ دى دا بۆ کواشێ بھێتە رەوانەکرن”.

زێده‌تر گۆت: “ئەم ل شەش سۆتنگەھێن نەخۆشخانێن ئازادی و تەنگاڤیان و ژن و زارۆبوونێ و سۆتنی و جوانکاری و بنگەھەکێ ساخله‌ميێ چارە دکەين، ھەیڤان ھەتا چار ھزار تەنێن گلێشێ نوشداری دھێنە چارە کرن.”.

ئاشکەرا ژی کر کو ھندەک گلێشێ نوشداری گەلەک یێ ب مەترسینە، ئەو گلێش ناھێتە سۆتن، چونکو غازاتێن ژەھراوی ژێ ده‌ردكه‌ڤن، ھەر ماددەکێ چێکری بیت، ناھێتە سۆتن وەکو رساس و سلڤەری و کادمیوم وەکو پاتریان و فلمێن تیشکێ، ئەو بۆریێن پلاستیکی یێن سیلانی و کیسکێن خوینێ و کۆپێن دەستئاڤان، “ئەڤە ھەموو نابیت بھێنە سۆتن چونکو کەرەستێن پيسن، ھەکە بھێنە سۆتن دێ ژینگەھـ و ھەوا پیس بن”.