بارزانیێ نەمر ژیانەک پر ژ خۆراگری وخەبات و ئازار دەربازکریە

ل بیرەوەریا ٣٩ سالیا وەغەرکرنا بارزانیێ نەمر، د.نزار عسمەت، رێڤەبەرێ گشتیێ ساخلەمیا پارێزگەھا دھۆکێ سمینارەک بو ھژمارەکا فەرمانبەران سازکر.

پشتی راوەستیان دەقیقەکێ بۆ گیانێ شەھیدان، د.نزار عسمەت، رێڤەبەرێ گشتیێ ساخلەمیا پارێزگەھا دھۆکێ دیارکر کو ل سالا ١٩٧٩ بارزانی نەمر خاترا خوە ژ ڤێ ژیانێ خواستیە و گۆت: کەسانێن وەکو بارزانیێ نەمر ھەموو ژیێ خوە پشتەڤانیا مرۆڤایەتی کریە، لەورا جھێ رێزگرتنێ نە و پێدڤیە ئەڤ رۆژە ب رێز وبلند رابگرین، چونکو بارزانی ژ سەرکردەیێن ھەرە دیار وگرنگێن بزاڤا رزگاریخوازیا گەلێ مەیە.

د.نزار عێمەت دیارکر ژی بارزانیێ نەمر سەرکێشیا مەزنترین شورەش کریە ئەوژی شورەشا ئەیلونا مەزن بوویە، ئەو شورەشا بوویە قوتابخانێن بەرخۆدان ونیشتیمانپەروەریێ و گەلێ کوردستانێ بەر ب خەباتەکا سەرانسەری و بەردەوام ڤەگوھاست بۆ سەرھلدان و دەستکەفتێن ئەڤرۆکە ب دەست مللەتی کورد ھاتین و گۆت: بارزانیێ نەمر ژ پێخەمەت پرسا رەوایا نەتەوا  گەلێ کورد ژیانەک پر ژ خۆراگری وخەبات و ئازار دەربازکریە.

ھەروەسا دیارکر بنەمایێن رێبازا بارزانیێ نەمر ب ھەڤرا ژیانا پێکھاتێن جڤاکی و ئێکرێزیا گەلێ کورد و پێکڤەکارکرنا سیاسی ژبۆ ئاڤاکرنا وەلاتەکێ پێشکەڤتی وسەربەخۆە بوویە، ھەردەم بارزانی نەمر ئاشتیی وپێکڤە ژیان ل پێشیا ھەموو تشتەکێ دانایە بۆ گەلێ مە. و خواست کو د رۆژێن وەکو ئەڤرۆ دا ھەموو پێکڤە کاربکەن بۆ پاراستنا وان دەستکەفتان.