روژانە پتری 100 تیشکا ل نەخۆشخانا گۆلان ل ئاکرێ دھێنە گرتن

 شەعبان عەبدال سەرۆکێ پشكا تیشکێ ل نەخۆشخانا گۆلان ل ئاکرێ بۆ نۆش نیوز ددەتە دیارکرن کو رۆژانە ھژمارەکا زۆر یا تیشکان ل نەخۆشخانێ بۆ خەلکی دھێنە گرتن رۆژ د گەل رۆژێ يا جودايه‌، بەلێ ب شێوەکێ گشتی رۆژانە پتر ژ 100 تیشکا بۆ خەلکێ دەڤەرێ دھێنە گرتن.

زێدەتر گۆت: “ئەڤ رێژە یا گونجایە ھەمبەر رێژا خەلکێ ئاکرێ، بەلێ رێژەکا زۆر ژ خەلکی داخوازا گرتنا تیشکێ دکەن کو  کەس پێدڤی نینە ژی و نیڤا وان نورمال دەردکەڤن، بەلێ ئەڤە داخوازا خەلکی یە و ھەر کەس بڤێت ئەم بۆ دگرین”.

سەروکێ پشكا تیشکێ ل نەخۆشخانا گۆلان ئاماژە دا وێ چەندێ کو تیشک بۆ ھەموو تەخ و چینێن جڤاکی دھێتە گرتن بێ جوداھی ژ (زارۆ، سنێلە، گەنج، دانعەمر) مە پێنج ئامیر ھەنە رۆژانە کار دکەن و ئێک تایبەت گرێدايی ددانایە، ئێک ژی یێ سینگی یە کو گرێدايی ئافرەتانە، ھەروەسا ئێک ژی یێ تیشکا رەنگا و رەنگە بۆ مەعیدێ و گۆلچیسکایە، دو ئامیر ژی بۆ جھێن دی وەکو پشتێ و دەست و پێیا، بەلێ یا پێدڤی یە ئامیرێن مە ھاتبانە گوھۆڕین ژ بەر کو دکەڤنن و نھا ئامیرێن پێشکەفتی ھاتینە ھەرێما کوردستانێ، بەلێ ھەتا نھا مە ئەو ئامیرە نینە.

گۆت ژی: “کارمەندێ تیشکێ یێ کێمە و کێم خوه‌ ددەنە تیشکێ ژ بەر کو تیشکێ مەترسی یا ل سەر مرۆڤی ھەيی و پێدڤی یە کارمەندێ تیشکێ بھێتە گۆھاڕتن و پێدڤی یە خوه‌ ب پارێزیت و ھەروەسا ھەتا نوکە خەلکێ مە ژی ب دروستی خرابیا وێ نزانیت”.

ب گورەيی ئامارا ساخلەمیا ئاکرێ د ھەرسێ مەھێن سالا 2018 ێ دا چار هزار و 805 تیشک ل نەخۆشخانا گۆلان ل ئاکرێ بۆ خەلکی ھاتینە گرتن، ھەروەسا سێ هزار و 406 سونار ھاتینە گرتن، 162 میفراس ھاتینە گرتن، پێتج هزار و 112 فلم ژی ھاتینە گرتن.