ل ئاكرێ رۆژانه نێزيكى 20 نشتهرگهريان بێ بهرامبهر بۆ نهخۆشان دهێنه كرن
حاجی میرانی سەروکێ پشكا نشتەرگەریا ل نەخۆشخانا گۆلان ل ئاکرێ دا دیارکرن کو رۆژانە نشتەرگەری ل نەخۆشخانێ بۆ خەلکێ دەڤەرێ و ئاواران ژی بێ بەرامبەر دھێنەکرن، ئەڤ نشتەرگەریە ژی ب شێوەکێ رێزبەندی ل دووڤ وێ مێژوویا بۆ ھاتیە دەست نیشانکرن دھێنەکرن.
دا زانين ژى كو ب شێوەکێ گشتی رۆژانە 15 ههتا 20 نشتەرگەریا ل نەخۆشخانێ دھێنەکرن کو چەندین جورێن نشتەرگەریا ب خوه ڤەدگریت.
گۆتژى: “ئەڤ نشتەرگەریە ل نەخۆشخانێ دھێنەکرن بێ بەرامبەر بۆ خەلکی و ھەمو ژ لایێ تایبەتمەندیێن نشتەرگەریا دھێنەکرن، لێ ئاریشا مە وەک بەشێ نشتەگەریا تنێ کێمیا دکتورێ بێھوشکرنێ یە، چونکو دکتورێ بێھوشکرنێ دکێمن و ئەوێن ھەی ژی ل نەخۆشخانا تەنگاڤيانە، لەوما ئەڤە بۆ مە زۆر جاران دبیتە ئاریشە و نەشێن لیستێن سپێدەھیا رێڤە ببەین، ژ بەر ھندێ داخوازا مە ژ جھێن شولەژێ ئەوە کو نۆشدارێن خۆلا و نۆشدارێن بێھوشکەر بۆ مە بھێنە دابینکرن دا کو ئەم بشێن ب شێوەکێ باشتر خزمەتا خەلکی بکەین”.
سەروکێ پشكا نشتەرگەریا ل نەخۆشخانا گۆلان ل ئاکرێ خویا كر كو بەشێ نشتەرگەریا دو لایا ب خوه ڤە دگریت؛ لایەک بۆ ئافرەتانە و لایەک دی ژی بۆ زەلامانە کو ھژمارا تەختێن ھەردو لایان دگەھیتە 32 تەختان و شەش تەختێن دی هاتينه زێدهكرن، “چونکی نەخۆش زێدەتر لێ دھێن و بارەکێ گران ل سەر مەیە و ئەڤا دھێتەکرن ژی زێدەترە ژ شیانێت مە”.
ئاماژە دا ھندێ كو ب رهنگهكێ گشتی ھژمارەکا ههتا رادەکێ باش یا نۆشدارێن تایبەتمەند ب نشتەرگەریان ڤە ھەیە و گۆت: “نۆشدارێن تایبەتمەند ب نشتەرگەرێن گوهـ و دفن و ھەروەسا نشتەرگەریێن گەھان مە کێماسی تێدانە کو داخواز دکەین کو نۆشدارێن تایبەتمەند ب ڤان نشتەرگەریان ڤە بۆ مە بھێنە دابینکرن”.
ل گورەی ئامارا نشتەرگەریێن گشتی کو ل ھەرسێ مەھێن سالا 2018 ل نەخۆشخانا گۆلان ل ئاکرێ بۆ خەلکێ دەڤەرێ و ئاواران ھاتینەکرن 440 نشتەرگەری بێ بەرامبەر بۆ وان کەسان ھاتینەکرن کو ناڤێن خۆ تومارکری بۆ ئەنجامدانا نشتەگەریێ.