جارا ئێکێ یە ل سەرانسەرى عیراقێ ئامیرەکێ نوو بۆ نشتەگەریان ل دھۆکێ دھێتە بکارئینان

 نۆشدارەکێ تایبەتمەندێ تێشک و سۆنارێ ل دھۆکێ دیار کر کو رێڤەبەریا گشتی یا ساخلەمیا دھۆکێ ئامیری ( ئار ئیف) بۆ ئەنجامدانا ھندەک جۆرێن نشتەگەریان ب تایبەتی یێن ھەستیان دابینکریە، نوکە سێ نەخۆش یێن پێ ھاتینە چارەسەرکرن ئەو ژی گرێکەکا گەلەک نەخۆش د ناڤ ھەستی یێن وان دا بوو ئەو گرێک بوو ئەگەر ئێشانەکا مەزن بۆ نەخۆشی دروست ببیت.

د. سوھەیب حەسەن، تایبەتمەندێ تێشک و سۆناری ل نەخۆشخانا ئازادی یا فێرکرنێ ل دھۆکێ دیار کر کو بەری نوکە ھەر چەند دەمژمێران جارەکێ نەخۆشی حەبکێن تەناکەر دخوارن، لێ پشتی ئەڤ ئامیری نوو بۆ نەخۆشخانا ئازادی ھاتیە دابینکرن ئەو شیاینە بێخنە دکاری دا و خزمەتا نەخۆشان پێ بکەن و گۆت: “جارا ئێکێ یە ل سەرانسەری عیراقێ و ھەرێما کوردستانێ ئامیرێ (ئار ئیف) بۆ نشتەگەریان ل دھۆکێ دھێتە بکارئینان، ھەکە ل وەلاتێ تورکیا ئەڤ چارەسەریە بھێتەکرن ژ پێنج ھزار دۆلاران دبۆریت، لێ ل پارێزگەھا دھۆکێ ھیچ پارەک ناھێتە وەرگرتن، ئەم ڤان نەخۆشان دەست نیشان ناکەین بەلکو نۆشدارێن تایبەتمەند دەست نیشان دکەن دەمێ دبینن گرێکەکا د ھەستیێ نەخۆشی دایە و نەخۆش پێ گەلەک دئێشت ئەو دێ بۆ مە فرێکەن، لێ یا گرنگ ئەو نەخۆش بەری بھێتە نشتەگەریکرن پێدڤیە وەکو ھەر نشتەگەریەکا دی نێزیکی شەش دەمژمێران خوارنێ نەخۆت و ئاڤی ژی بەری نشتەگەریێ ب چار دەمژمێران ڤەنەخۆت”.

ناڤھاتی ئاشکرا کر کو گەلەک نەخۆش بێ ھۆشکەریا گشتی وەردگرن ژ بەر کو گرێکەکا گەلەک ب ئێشە و ئەو وێ ئێشانێ ھەموو یێ بەرددەن و دچیتە د ناڤ خۆینی دا وی دەمی دا پێدڤیە نەخۆش ژی یێ بێھوشکری بیت و گۆت: “بەری نوکە چارەسەریا وان گەلەک یا ب زەحمەت بوو، چونکی ب ملیمانە رەنگە چار ھەتا پێنج ملیما بن د ناڤ ھەستیکەکی دا ھەموو خۆین و پارچێن ھەستیکی دھێنە راکرن، لێ نوکە ئامیرێ ئار ئیف ل سەرانسەری جیھانێ ب رێژا 95% یێ سەرکەفتی یە دەمێ چارەسەری ب ریێا ڤێ ئامیرێ نوو دھێـتە کرن ئەو گرێک بنبر دبیت و نامینت”.

د. سوھەیب حەسەن ل گەلەک وەلاتان مەشق و راھێنان ل سەر ڤی ئامیرەی کریە وەکو وەلاتێ دانیمارک و پاکستان و تورکیا بۆ دەمێ سێ ھەیڤان ل ھندێ ژی ل سەر ھەمان ئامیرە کارکریە، نوکە ل دھۆکێ ئەڤ ئامیرە کەفتیە د خزمەتا نەخۆشان دا