رێڤەبەرەکێ نوو بۆ ساخلەمیا ئاکرێ ھاتەدانان

رێڤەبەرەکێ نوو بۆ ساخلەمیا ئاکرێ ھاتەدانان

  ئەڤرۆ ل رێکەفتی ٧-٦-٢٠١٨ ب ئامادەبوونا دکتور نزار عسمەت رێڤەبەرێ گشتیێ ساخلەمیا پارێزگەھا دھوکێ و مازن محەمەد سەعید دەڤەردارێ قەزا ئاکرێ رێورەسمێ گوھارتنا رێڤەبەرێ ساخلەمیا ئاکرێ ھاتەکرن.

ل دەست پێکێ دکتور بەشیر تەھا قاسم پەیڤەک پێش کێش کر ل دور ماوێ دەست بکاربوونا خۆ و ئەو گوھرینێن دروست بووی ل ساخلەمیا ئاکرێ و دیارکر کو دڤی ماوەی دا گەلەک کارێن باش ھاتنەکرن و گەلەک گوھرینێن باش خوڤە دیتن و چەند ئامیرێن پزیشکی و نوی ھاتن دابینکرن و چەندین یەکە و بەش دڤی ماوەی دا ھاتنە ڤەکرن ل نەخوشخانا گولان و نەخوشخانا تەنگاڤی دا، سەرەرای وێ قەیرانا دروست بووی و شەرێ پێشمەرگەی دگەل داعش، “ئەز خۆ سەر بلند دبینم کو من شیابیت خزمەتا مللەتێ خۆ کربیت و ب ھەڤکاریا وان ھەمی ھەڤالێن کو ل ساخلەمیا ئاکرێ دا کاردکەن کو مە ھەمویان وەک تیمەک پێکڤە کارکریە د بەرژەوەندیا گشتی دا”.   

گۆتژی: “ل دەست پێکا دروست بوونا شەرێ داعش پتر ژ ٤٠٠ تیمێن پزیشکی سەرەدانا بەروکێن شەری کریە ب ھەماھەنگی دگەل ساخلەمیا پارێزگەھا دھوکێ”.

رێڤبەرێ بەرێ یێ ساخلەمیا ئاکرێ دیارکر کو دپلانا وان دا بوو گەلەک تشتێن دی بکەین بۆ ئاکرێ کا پێدڤی ب چ ھەیە، “مە پلان پێش کێشی رێڤەبەریا گشتی یا پارێزگەھا دھوکێ کریە کا چ نەخۆشخانە و سەنتەر بۆ ئاکرێ پێدڤی نە بھێنە کرن، بەلێ ب سەدەما دروست بوونا قەیرانا دارای ئەم نەشیاین وان پلاانان بجهـ بینین”.

ل داویێ ژی دەست خوشی ل رێڤەبەریا گشتی یا ساخلەمیا دھوکێ کر بۆ پشتەڤانیا وان و پیروزباھی ل رێڤەبەرێ نوو یێ ساخلەمیا ئاکرێ کر.

دکتور نزار عسمەت رێڤەبەرێ گشتی یێ ساخلەمیا پارێزگەھا دھوکێ دیارکر کو دکتور بەشیر تەھا جھێ باوەریا وان ھەمیان بوو و وێ باوەریێ وەکر کو ڤێ بەرپرسیارەتیێ وەربگریت و سەرەرای وێ قەیرانا دروست بووی، بەلێ ئیدارەکا سەرکەفتیانە ل ئاکرێ رێڤەبریە، ھەر چەندە رێڤەبەرنا ساخلەمیا ئاکرێ نەکارەکێ ئاسانە و هەتا رادەکێ باش دکتور بەشیری سەرکەفتیانە کارێ خۆ کر، “دشیا سەرەدەریێ دگەل ھەمی لایەنان بکەت ب جوانی و ئەو پلانا رێڤەبەریا ساخلەمیا ئاکرێ پێش کێشی مە کری جھێ رێزێ بوویە و پشتەڤانی مە لێ کریە و مە پەسەند کریە بۆ ھندێ کو دپاشەروژێ دا جێبەجێ بیت و سوپاس بۆ ھەمی کەسێن ساخلەمیا ئاکرێ دا کاردکەن شیاینە خزمەتێ پێش کێشی خەلکی بکەن و داخازا سەرکەفتنێ بۆ رێڤەبەرێ نوو یێ ساخلەمیا ئاکرێ دکتور (سالح مستەفا)ی دکەین و داخازێ ژ ھەمی ھەڤالێن ساخلەمیا ئاکرێ دکەین پشتەڤان بن دگەل رێڤەبەرێ نوو یێ ئاکرێ و بۆ وی بەرنامێ ھەی بشێن جێبەجێ بکەن ب سەرکەفتیانە”.

ل داویێ ژی ژلایێ دکتور نزار عسمەت رێڤەبەرێ گشتی یێ ساخلەمیا پارێزگەھا دھوکێ خەلاتەکێ رێز لێنانێ پێش کێشی دکتور بەشیر تەھا کر وەک رێزگرتنەک ل خزمەتا وی ل دەمێ دەست ب کاربوونا وی.

دکتور سالح مستەفا رێڤەبەرێ نوو یێ ساخلەمیا ئاکرێ ژی پەیڤەکێ دا گۆت: “جھێ دلخوشیێ یە کو ئەو باوەری دایە من و ئەز ھەژی ڤی پوستی دیتیم و ھیڤیا من ئەوە ئەم ھەمو پێکڤە وەک تیم بشێن ئیدارەکا سەرکەفتی رێڤەبەین کا چەوا بەری نھا سەرکەفتی بوویە و بەردەوامێ بدەینە وێ پلانێ و بشێن د ئایندەی دا کارێن باشتر بکەین بۆ ساخلەمیا ئاکرێ خەلک ژێ مفادار بیت و ئارمانجا مە ئەوە خزمەتا خەلکێ دەڤەرا ئاکرێ بکەین”.

ھەروەسا ل داویێ مازن محمد سەعید دەڤەردارێ ئاکرێ ژی گۆت: “دکتور بەشیر تەھا جھێ رێزێ یە و ھەم وەک کەسایەتی و وەک رێڤەرێ ساخلەمیا ئاکرێ و ھەمی دەما کارکریە بۆ ھندێ خزمەتا خەلکێ دەڤەرێ بکەت و دەست کەفت زوربووینە دڤی ماوێ دەست بکاربوونا ویدا، بەلێ گەلەک کێماسی ژی ماینە ئەڤەژی بۆ وێ قەیرانا دارایی و حکومەتێ دزڤریت کو نەشیاینە وەک پێدڤی خزمەتێ بکەن، لێ سەرەرای ھەر تشتەکێ کارێن گەلەک باش ژی ھاتینەکرن و داخاز دکەین کو ھێشتا کارێن باشتر بھێنەکرن و پیروزباھیا رێڤەبەرێ نوو یێ ساخلەمیا ئاکرێ دکتور سالح مستەفای دکەین بۆ دەست ب کاربوونا وی ھیڤیا سەرکەفتنێ بۆ دخوازین