بۆ جارا ئێکێ نشتەگەری ل سێمێلێ ھاتنە ئەنجامدان

ژ بەر نەبوونا پشکا نشتەگەریان ل قەزا سێمێلێ بەری نوکە نەخۆش بۆ دھۆکێ دھاتنە ڤەگوھاستن، بەلێ پشتی بەرفرەھکرنا نەخۆشخانا گۆلان و ڤەکرنا پشکێن نشتەرگرەی و تەنگاڤیان بۆ جارا ئێکێ نشتەرگەری لێ ھاتنە ئەنجامدان.

د. دلشەنگ محەمەد، بسپۆرێ نشتەگەریا گشتی دیار کر کو ب ڤەکرنا پشکا نشتەگەریان ئێدی نشتەگەری گیروو نابن و ل دەمەکێ زوو دێ ھێنە ئەنجامدان.

ژ ئالیێ خوە ڤە د. محەمەد سالح حەمید، بەرپرسێ پشکا تەکنیکی ل ساخلەمیا دھۆکێ دیار کر کو ھەموو ئامیرە و پێدڤیێن نشتەگەریان بۆ قەزا سێمێلێ ھاتینە دابینکرن و گۆت: "ھندەک کێماسی د ھندەک تایبەتمەندیان دا ھەنە، لێ بزاڤ دێ ھێنەکرن ئەو ژی زوو بھێنە دابینکرن".

د. یوسف حاج، جێگرێ کەرتێ ساخلەمیێ ل سێمێلێ ئاشکرا کر کو ئەو دێ بزاڤێ کەن رۆژانە نشتەگەری بھێنە ئەنجامدان و ھێدی ھێدی رێژا نشتەگەریان زێدە بکەین داکو نەخۆش پێدڤی ب چو جھێن دی نەبن.